Bulevardi i Ri/ Bregu i Lumit kërkon dëmshpërblimin, Tabaku: Në vitin 2013 gjithçka ishte gati. Ky shtet ka përfunduar!

Ky shtet ka përfunduar! Kështu u shpreh deputetja e PD, Jorida Tabaku pas takimit që zhvilloi me banorët e Bregut të Lumit, të cilët ende nuk kanë marrë dëmshpërblimin për banesat e shembura për projektin e  Bulevardit të Ri, zonë kjo e cila ka  mbetur e pazhvilluar ndonëse fondet ishin siguruar që në vitin 2012.

“Megjithëse në bashki deri në vitin 2013 në bashkëpunim me qeverinë ne bëmë të gjithë vlerësimin e pronës, përgatitëm VKM për një pjesë të madhe të banorëve për lotin e parë dhe të dytë, që nga viti 2013 kur qeveria ndryshoi, nuk është marrë asnjë masë për të bërë VKM-në për dëshmpërblimin e banorëve të pjesës së fundit të bulevardit,” tha deputetja e Partisë Demokratike duke shtuar:

“Për këtë projekt z. Basha në 2012 siguroi fondet për zhvillimin, e cila sot nuk është e zhvilluar: pa shkolla, pa rrugë, për energjinë elektrike është investuar vetë nga banorët!”

Ky shtet për mua ka përfunduar. Nëse na cënojnë pronën, pasurinë që ju keni vendosur me 25 vite pune, atëherë se di se çfarë na ngelet në dorë, konstaton deputetja e PD, Jorida Tabaku duke përfunduar:

“Në emër të PD i premtova banorëve se kjo parti ka të njëjtin standard. Do kemi këtë standard për këta banorë, që të dëmshpërblehen. Nuk mund të pranojmë që sot fëmijët të nxirren në rrugë dhe investimi i gjithë jetës së këtyre banorëve të shkelet me këmbë. Këta banorë këtu kanë përfunduar procesin e legalizimit. Ligji nuk e lejon që këto të nxirren nga banesa. Këtu janë 46 banesa, por janë disa familje pasi banojnë disa krerë në një shtëpi.”