Burg për krerët e PD/ Reagimi, Basha: Edi Rama në panik po nxitë vëllavrasjen!
Pas vendimit të Gjykatës së Elbasanit me masën e arrestit me burg për Kryetarin e PD të Librazhdit, Bujar Vreto dhe kryetarin e PD të Përrenjasit, Arjan Karriqi, si dhe dy qytetarë të tjerë Dashamir Boja dhe Bujar Kllojku, ka reaguar Kryetari i Partisë Demokratike, Lulzim Basha duke e konsideruar si vendim burracakësh të gjyqtarëve dhe prokurorëve të korruptuar të Edi Ramës:
“Është represion ndaj kundërshtarëve politikë i urdhëruar direkt nga Edi Rama. Qëllimi është vetëm një: persekutimi dhe trembja e kundërshtarëve politikë për të shuar protestën dhe përpjekjet kundër qeverisjes së kriminalizuar të Edi Ramës.”
Duke shprehur solidaritetin për familjet e katër demokratëve të arrestuar që nuk do t’i kenë prindërit dhe bashkëshortët në shtëpi sot, Lulzim Basha iu drejtua Edi Ramës dhe klanit të tij kriminal në qeveri:
“Opozita nuk frikësohet. Opozita nuk trembet. Opozita nuk tërhiqet. Unë, të gjithë demokratët në çdo cep të Shqipërisë dhe të gjithë qytetarët e bashkuar do ta luftojmë këtë qeveri kriminale derisa Edi Rama dhe kriminelët e tij të dalin para drejtësisë së vërtetë.”
Me këtë rast lideri i opozitës iu drejtua edhe policëve, prokurorëve dhe gjyqtarëve të Elbasanit, të cilët sot vendosën të mbajnë të burgosur politikë njerëz të pafajshëm, ndërkohë që kanë vite që tolerojnë dhe mbrojnë krimet e Qazim Sejdinit dhe të bandave të Elbasanit:
“Ju e dini shumë mirë se çfarë është ligji dhe drejtësia! Ju e dini shumë mirë se është kriminale që një prokuror dhe gjyqtar të braktisë ligjin dhe interesin publik për t’i shërbyer politikës dhe krimit. Edi Rama mund t’ju ketë premtuar se do t’jua falë korrupsionin dhe shkeljet ligjore. Edi Rama mund t’ju ketë premtuar se do ta kaloni vetingun. Kurse unë dua t’ju premtoj se shpejt do ta shoqëroni Edi Ramën përpara drejtësisë,” tha Basha duke shtuar se Prokurori dhe Gjykatësi i korruptuar është funksionari më i rrezikshëm në shoqëri dhe nuk do ta harrojnë dhe tolerojnë krimin dhe korrupsionin e tyre.
Në fund iu drejtua edhe të gjithë bashkëqytetarëve:
“Në 21 vjet pushtet, Edi Rama ka vjedhur përditë çdo gjë që i ka dalë përpara. Në etjen e tij të pangopur për para, ai u fut që herët në rrugën e bashkëpunimit me krimin. Kjo rrugë e çoi në më shumë krime dhe e ka sjellë në një pikë kur ai dhe krimi tashmë janë e njëjta gjë. Dhjetëra miliona euro janë harxhuar për të kapur mediat dhe zërat publikë me qëllim fshehjen dhe manipulimin e të vërtetës përmes propagandës dhe keqinformimit. Tani e gjithë bota po zbulon më në fund Edi Ramën e vërtetë: një të inkriminuar pa ndjenja, i cili për para dhe karrike nuk ndalet para asgjëje,” tha Basha dhe tani që e ka kuptuar se u zbulua, dhe se pushtetin nuk e mban dot më me blerje zgjedhjesh dhe propagandë, Edi Rama ka vendosur ta mbajë atë me dhunë.
“Pasi asgjësoi gjykatat dhe vuri nën kontroll të plotë prokurorinë, ai ka disa muaj që ushtron dhunë sistematike kundër opozitës dhe qytetarëve. Mbi 500 qytetarë janë ndaluar gjatë 5 muajve të fundit; Mbi 50 qytetarë janë arrestuar; Me dhjetëra gazetarë janë dhunuar në krye të detyrës; Me mijëra qytetarë janë sulmuar me gaz lotsjellës dhe mjete të forta nga policia; Por dhuna e tij dështoi. Njerëzit nuk u frikësuan. Protestat u bënë përherë e më të mëdha!” dhe kjo është ajo që e ka trembur dhe e ka futur në panik Edi Ramën, prandaj tha ai, tani ai ka vendosur të zbatojë një plan të rrezikshëm, për nxitjen e ndarjeve dhe përplasjeve sociale në Shqipëri.
“Edi Rama tani po kërkon të nxisë dhunë masive në Shqipëri, ai po kërkon të nxisë përplasje mes qytetarëve, po kërkon të nxisë luftë mes militantëve të ndryshëm politikë, po kërkon të nxisë vëllavrasjen mes shqiptarëve. Për këtë qëllim, ai po përdor policinë, prokurorinë, gjykatat dhe mercenarët e tij në media, për të krijuar ngjarje që provokojnë, që ndezin emocionet, që nxisin revoltim dhe reagime publike,” tha Kryetari i PD, dhe motoja e Edi Ramës tani është: Çdo gjë të sakrifikohet, çdo gjë të shkretohet vetëm që ai ai të ruajë karriken dhe milionat e tij. Është një plan i dëshpëruar që do të sjellë fundin e tij, dhe ne nuk do të lejojmë që fundi i Edi Ramës të arrihet me kosto për Shqipërinë.
Në fund, Kryetari i Partisë Demokratike, Lulzim Basha, tha se do të qëndrojnë duke protestuar deri në fitore, të bashkuar duke i futur frikën në palcë Edi Ramës dhe mercenarëve të tij ndërsa ftoi të gjithë qytetarët që të bashkohen në protestën e së premtes përfundoi:
“Ne luftojmë për të ardhmen e fëmijëve tanë, kurse ata janë zvarranikë që luftojnë për karriken që kanë marrë duke ju vjedhur votën, paratë, pronat dhe mundësitë. Tani është koha t’i merrni ato mbrapsht. Asnjë hap pas, deri në fitoren e afërt të betejës tonë për Shqipërinë si gjithë Europa.”
