Burgu i korrupsionit “Edvin Kristaq Rama”

nga Agim Popoci

Ligji Antimafia i miratuar nga parlamenti i ri legjitim do të jetë vendimi i parë i Qeverisë së re. Kështu tha dje Kryetari i Partisë Demokratike, Lulzim Basha, ndërsa po prezantonte Platformën Antikorrupsion duke u zotuar se çdo gjë e marrë në mënyrë abuzive do t’i kthehet publikut me efekt prapaveprues.

Kjo deklaratë nuk është se bindi që dje, të gjithë shqiptarët, se me ndryshimin e qeverisë nuk do të dëgjojnë më kompani që licencohen pak para tenderit, kompani pa përvojë, kompani off shore, propozime të pakërkura, tendera ndaj njerëzve të paautorizuar, skualifikime të padrejta për qëllime klienteliste, kompani që i plotësojnë kriteret po i skualifikojnë, dhe se çdo qindarkë do ju kthehet shqiptarëve me Ligjin Antimiafia, por, e kanë të qartë se cili do njeri që vjen pas Edi Ramës nuk ka rrugë tjetër, në këtë Shqipëri të shkërmoqur, pa ekonomi, pa shëndetësi, pa arsim, me krim nëpër këmbë dhe pa sistem të drejtësisë!

Meqë Lulzim Basha e bëri publik vendimin e parë të Qeverisë së tij të re, ky vendim duhet doemos të shoqërohet edhe me një “aksesor” tjetër Antimafia, për ti dhënë fund njëherë e mirë kësaj epokë kriminale që dëmtoi rëndë kombin shqiptar!

Shqiptarët tashmë e kanë të qartë se të gjitha ndryshimet urbane dhe kriminale që ka bërë Edi Rama nëpër Shqipëri kishin për qëllim, ato synime kriminale që kishte kryer në Tiranë, për shënjimin e epokës së tij qeverisëse. Në pamundësi për zhbërjen e gjithë këtyre veprave kriminale dhe kurimit të zhdukjes së identitetit shqiptar, Lulzim Basha ka vetëm një rrugëzgjidhje: Ndërtimin e Burgut të Korrupsionit “Edvin Kristaq Rama”!

Edi Rama mund të mos jetë banori Nr.1 i këtij burgu që do ta ndërtonte Qeveria Basha, por çdo i dënuar për korrupsion do të “pushonte” në vendin e tij të shenjtë, duke gëzuar më pas lirinë me një CV të përmbyllur në Burgun e Korrupsionit “Edvin Kristaq Rama”!

Në të ardhmen, tironsit do ta kenë të vështirë t’ua përshkruajnë nipërve dhe mbesave se ku ishte Teatri Kombëtar dhe pse u shembë; Ku ishte Sheshi Skenderbe dhe pse u zëvendësua me një gungë; Pse u shembë një stadium për tu ndërtuar një stadium me hotel; Pse u shua Rruga e Durrësit kur Durrësi vazhdon të jetë aty ku ishte; Kush ishte ai Spital që blinte Spitale?! Ose, dhe, pse kanë mbetur kaq pak gjëra që Qet Kastrati dhe Samir Mane nuk i kanë blerë?!

Por, me Burgun e Korrupsionit “Edvin Kristaq Rama” të gjitha këto enigma, do ta kenë përgjigjen në një paketë, në arkivin e kësaj godine ku do të ngrihet një histori krimi, ku do të kuptohet kush është Edi Rama, Kristaqi, PS, Ilir Meta dhe gjithë kasta që prodhoi këtë krim shekullor që futi në dhe kombin shqiptar.  

Pas shumë vjetësh Edi Rama dhe Damian Gjiknuri mund të jenë duke shëtitur në Lungomare, por në Burgun e Korrupsionit “Edvin Kristaq Rama”, studentët e ndërtimit dhe projektuesit e rinj shqiptar të ndërtimit të rrugëve, mund të gjejnë historinë se si u nda në dysh kombi shqiptar me një tra të vetëm, pse nuk iu dha koncesioni kompanisë së parë fituese dhe kush ishte ai që i tha Qetit se do të marrë 5 euro për një kosovar të ndyrë!   

Pas shumë vjetësh, Edi Rama dhe Ilir Beqja mund të jenë në liri, pasi të kenë kryer vuajtjen e dënimit, por në arkivin e këtij burgu do të kemi historinë e tyre të korrupsionit me PPP-të. Pse nuk funksionoi shëndetësia, si u përbuzë kaq shumë pacienti shqiptar, pse u mbyllën spitalet private në kohën e covidit me përjashtim të njerit, dhe kush është ky NJËRI, nuk do të jenë më enigmë!

Në Valbonë mund të ketë 24 HEC-e, në Shqipëri 24 Gener dhe në këtë lum të mrekullueshëm mund të ngelin vetëm 24 trofta, por në Burgun e Korrupsionit “Edvin Kristaq Rama” do të jenë vetëm ata që zbrazën këtë zonë turistike për të mbushur xhepat e tyre kriminal.

Në TV nuk do të dalin truprojet e Mehmetit apo Enverit, ata nuk do të jenë më që të rrëfejnë si u vra Mehmet Shehu dhe nuk e dëgjoi Fiqireti, si e takoi Enver Hoxha disidentin Ismail Kadare apo si ulej Andi Bushati në prehrin e Xhaxhit, apo dhe si pinte çaj Saliu me Hysni Kapon! Por, gardianët e Burgut të Korrupsionit “Edvin Kristaq Rama” mund të rrëfejnë se si Edi e rrahu Taulantin, si qante Damiani apo pse nuk dilte nga qelia Beqja; Pse Elisa gërthiste o Skenderbe dhe pse Erion Veliaj i thoshte pusho moj debile!

Emisioni “Shihemi në Gjyq” mund të transmetohet edhe pa Eni Çobanin, Ardit Gjebrenë dhe normalisht Sandër Frangajn, por aty mund të zihen ish të burgosurit, për të vërtetat dhe qyfyret e përshkruara në librat e tyre të kujtimeve, mbi vuajtjet në Burgun e Korrupsionit “Edvin Kristaq Rama”.

“Opinon” me Fevziun mund të ketë edhe sikur mos të ketë TV Klan, ama për të dy këto fatkeqësi natyrore do të ketë përgjigje në këtë burg, që do të përmbyll një epokë turpi, një qeverisje kriminale, dhe një fund që do ti shërbej në të ardhmen të gjithë zyrtarëve publikë, pronarëve të kompanive private dhe të afërmve të tyre, që mund të tundohen nga mali me para, dhe të mos çajnë kokën për SPAK ose GJKKO, por, vendimi i tyre, nëse do të zhyten ose jo në ujërat e korrupsionit, gjithsesi do të ketë vetëm një emër:

Burgu i Korrupsionit “Edvin Kristaq Rama”!