Bütikofer: Serbia po i tregon BE-së gishtin e mesit!
Vuçiç po ia tregon gishtin e mesit Bashkimit Evropian, tha deputeti gjerman, Reinhard Bütikofer, duke kritikuar qëndrimin në Kinë të Presidentit të Serbisë, Aleksandar Vuçiç në kohën kur në Tiranë u mbajt Samiti i Procesit të Berlinit.
Dhe jo vetë kaq! Deputeti gjerman thekson se edhe kryeministrja serbe Ana Brnabiç që zëvendësnte Vuçiçin në Tiranë, refuzoi ta nënshkruante aneksin e marrëveshjes së Brukselit ndryshe nga Kryeministri i Kosovës, Albin Kurti, që ishte i gatshëm.
“Serbia po i tregon BE-së gishtin e mesit: Vuçiç preferon të shkojë në Pekin; kryeministrja serbe refuzon t’i bashkohet fotos familjare, sepse refuzon të respektojë flamurin e Kosovës,” thekson Bütikofer përmes rrjetit soocial X duke përfunduar:
“Dhe, natyrisht, ata nuk duan të firmosin një marrëveshje, të cilës nuk kanë ndërmend t’i përmbahen. Gjeni gabimin.”
Lëvizjet e fundit të Presidentit të Serbisë, Aleksandar Vuçiç, i ka kritikuar edhe Raportuesja për Kosovën në Parlamentin Evropian, Viola von Cramon.
Nga Kina, Vuçiç pati kritika të shumta për Kosovën, derisa tregoi për bisedat që i zhvilloi atje, ndër të tjera edhe me Vladimir Putinin.
