Buxheti 2019/ Bashkitë e djathta: Zhvillimi ekonomik vendor në rrezik, mund të mbetet pezull!
Nëse problematikat e vëna re në Projektbuxhetin e vitit 2019 nuk marrin një tjetër zgjidhje, zhvillimi ekonomik vendor do të mbetet pezull,theksuan gjatë një takimi në Mallkastër, kryetarët e Bashkive të djathta duke shtuar se kjo do të imponojë një qeverisje vendore jo të shëndetshme.
Kryetarja e bashkisë së Shkodrës Voltana Ademi, në cilësinë e kryetares së shoqatës tha se projektbuxheti mbetet sërish larg normave dhe raporteve mes pushtetit vendor dhe atij qendror.
“Ne kemi bërë një konsultim për projektbuxhetin e vitit 2019, por edhe për sfidat që kemi në menaxhim me të gjithë kryetarët e Bashkive, por sidomos me gjtihë stafet. Për këtë kemi qenë shoqata e hapur e Bashkive të Shqipërisë, e cila ka patur zërin e lartë dhe ka thënë atë çfarë është e vërteta kur bëhet fjalë për pushtetin vendor.”
Duke u ndalur edhe tek zgjedhjet lokale të vitit të ardhshëm, Ademi tha se në këto zgjedhje duhet të shprehet vullneti i popullit dhe të mos përsëriten fenomene, të cilat kanë dëmtuar procesin zgjedhor. Drejtori i Fondacionit “Konrad Adenauer”, Valter Glos u shpreh se ka ardhur momenti që të realizohet reforma zgjedhore nga palët në politikë:
“Duke parë edhe situatën politike në vend, ka ardhur momenti për të diskutuar dhe për ta realizuar bashkë këtë objektivë.”
Në fund, kryetarët e Bashkive të djathta duke konstatuar se Projektbuxheti i vitit 2019 nuk i përgjigjet nevojave të bashkive, pas diskutimeve, kanë dalë me një deklaratë të përbashkët.
