Buxheti 2020 për Gjykatën Kushtetuese/ Debati, Sekretari: Jemi të zhgënjyer! Fino: Institucion joefektiv!

Buxheti për vitin 2020 për Gjykatën Kushtetuese ka shkaktuar debat banal në Komisionin parlamentar të Ligjeve. Deri sa Sekretari i Përgjithshëm i Gjykatës Kushtetuese, Eugen Papandile, duke shprehur zhgënjimin për buxhetin e parashikuar tha se ky institucion punon në një godinë të amortizuar madje edhe të plasaritur pas tërmeteve të fundit por kjo nuk e ka shqetësuar relatorin Bashkim Fino i cili madje kritikoi Ministrinë e Financave si dorëlëshuar pse i jep këtij institucioni fonde shtesë një institucioni kur nuk është efektiv për të bërë investimin.

Por Fino përveç vërjetjeve nga Papandile, u kundërshtua dhe nga deputeti socialist, Xhemal Qefalia.

Eugen Papandile: “Kushtetuesja për vitin 2020 ka pasur kontakte të vazhdueshme me Ministrinë e Financave. Po fillojmë me zhgënjimin që kemi për buxhetin e 2020, është ulur nga tavani në 3 mln lekë të reja. Janë hequr nga shpenzimet operative. Sa i përket investimeve. Është një kërkesë shumë e vjetër që nuk është marrë parasysh. Jemi në të njëjtën godinë ku ndodheni ju ligjvënës dhe ambjentet e amortizuara të Gjykatës Kushtetuese, e vetmja që ka mbetur pa u rikonstruktuar, janë rënduar nga goditja për së dyti dhe nga tërmeti. Mendoni kushtet në të cilat anëtarët e rinj të Gjykatës Kushtetuese kanë filluar punë dhe do ta vazhdojnë atë punë. Kemi kërkuar rikonstruksion dhe nuk është miratuar kërkesa. Mbledhja e gjyqtarëve në 2017 ka miratuar 72 punonjës, jemi 62  sepse 10 të tjerë që kemi kërkuar nuk janë miratuar. Kjo do të ndikojë në keqfunksionimin e gjykatës duke marrë parasysh fluksin që do ketë gjykata. Nuk është miratuar dhe parku i makinave.

Bashkim Fino: Buxheti është në rritje dhe i mjaftueshëm për të realizuar aktivitetin. Buxheti 2019, totali i shpenzimeve është 114 milion lekë dhe në 2020 japim 161 milion lekë. Marrim mallrat dhe shërbimet. Në buxhetin e 2019 kanë qenë 34.5 milion lekë. Në këtë 10 mujor janë harxhuar 17. Nuk besoj se do të harxhohen gjysmat për dy muaj dhe me të drejtë Ministria e Financave ka parashikuar mallra dhe shërbime 31.5 milion lekë. Ka rënie prej 3 milion, por duke parë ecurinë e këtyre shpenzimeve mendoj se është e pranueshme. Sa i përket investimeve, unë jam kundër investimeve që u jepen, më mirë të jepet një investim tamam. Po të banalizosh investimet, në 2019 kishit 4 milion investime, keni realizuar 0.2. Por Ministria e Financave u jep dhe 4 milion  lekë të reja për 2020. Pse ja jep një institucioni kur nuk është efektiv për të bërë investimin? Duhet të bëni një analizë financiare. Ministria e Financave është treguar dorëlëshuar, nuk duhet t’u jepte fare. Shifrat për Gjykatën Kushtetuese janë shumë të sakta, shumë të drejta dhe me rritje.

Andi Përmeti: Keni dy punonjëse për të njëjtin vend. A keni kërkuar buxhet shtesë? Refuzoni këtë turp dhe luftë politike të dy personave për të kapur drejtësinë. Jemi në një absurditet që edhe Albert Kamy do ta kishte zili.

Eugen Papandile: Unë kam ardhur për buxhetin. Ftesa më ka ardhur për buxhetin e shtetit dhe Gjykatës Kushtetuese.E shikoj se Gjykata Kushtetuese mbetet opozitë gjithmonë jo për shkaqe politike, por buxheti. Zoti Fino investimet janë kryer 100%. Atë 4 milionëshin modest. Nëse ne nuk kemi dhe nuk meritojmë investime ok. Mendoj se e kemi shumë të nevojshme, harrova t’ju bëj foto nga zyrat e plasaritura.

Bashkim Fino: Nuk thashë se nuk meritoni investime. Të dhashë dy shifra dhe shpresoj të më vërtetoni se janë bërë investimet. Më vjen mirë nëse e ke realizuar dhe më vjen mirë që Ministria e Financave të ka vënë edhe 4 milion.

Xhemal Qefalia: Nuk ka një përditësim të shifrave. Ministria e Financave të përditësojë shifrat.

Bashkim Fino: Këta po bëhen të gjithë ekspertë në fushën e financës, unë nuk bëhem ekspert në fushën e sigurisë ku është Qefalia. Këtu janë evidencat e fundit të tetorit nga Thesari. Sekretari i Përgjithshëm nuk tha se nuk janë në rregull shifrat.

Xhemal Qefalia: Je i vonuar.

Bashkim Fino:Këto fonde zerohen, nuk transferohen për 2020. Lëre zoti Qefalia tani.