Buxheti 2022, Ibrahimaj: 1 mld lekë garanci sovrane për turizmin dhe manifakturën, 27.45 mld lekë për pushtetin vendor

Për vitin 2021 pritet një rritje e ekonomisë me 7.6%, ndërsa vitin e ardhshëm mbi 4%. 1 miliard lekë do të jenë garanci sovrane për turizmin dhe manifakturën. Ministrja e Financave dhe Ekonomisë, Delina Ibrahimaj, gjatë prezantimit të projektbuxhetit 2022 në Komisionin e Ekonomisë deklaroi se 500 milionë lekë do të shkojnë për pastrimin e mjedisit, ndërsa për pushtetin vendor 27.45 miliardë lekë.

“Për vitin 2021 presim rritje 7.6% dhe në vitin që vjen mbi 4%. Produkti i Brendshëm Bruto për banor në vitin 2013 ka qenë në vlerën 466 mijë lekë, shkoi 568 mijë lekë në vitin 2020 dhe pritet që të jetë 661 mijë lekë për banor në vitin 2022. 563.8 miliardë lekë pritet që të jenë të ardhurat e vitit 2022.

Për të mbështetur rritjen e mëtejshme ekonomike, ne prezantojmë pr/buxhetin 2022 që është buxheti më i madh në histori. Ky dokument fokusohet tek vijimi i reformave për rritje ekonomike dhe punësim, mbështetja e shtresave në nevojë, rritja e produktivitetit, forcimi i shtetit ligjor, digjitalizimi i ekonomisë, dhe projektet në infrastrukturë.

Konsumi do rritet me 2.6% në vit, dhe do kontribuojë me 2.4% në rritjen ekonomike, dhe investimet do rriten 5.5% në vitet 2022-2024 duke kontribuar me 1.4% në vitet që vijnë.

Do ketë 1 miliardë lekë garanci sovrane për turizmin dhe 500 milionë lekë për pastrimin e mjedisit. Do ketë dhe një garanci sovrane 1 miliardë lekë për manifakturën. Do të jepen 250 milionë lekë për start up! 27.45 miliardë lekë do të jepen për pushtetin vendor”, tha ministrja.

Fiskalizimi do të rrisë të ardhurat

“Fiskalizimi pritet të rrisë të ardhurat. Kemi parashikuar rritje natyrale të të ardhurave si pasojë e rritjes ekonomike. Janë të parashikuara edhe efektet e paketës fiskale. Politikat e investimeve publike, ne presim që të vijojnë investimet që kanë filluar gjatë viteve të kaluara, sa i takon rrugëve dhe ujësjellësve. Këtë vit rritja ka ardhur si pasojë e rritjes në të gjithë sektorët, përveç bujqësisë. Kemi pasur rritje të konsumit, por edhe të investimeve. Parashikimet për vitin 2022 deri në 2025 janë të bazuara në strukturën e ekonomisë shqiptare. Këto parashikime janë në linjë me FMN dhe BSH,” shtoi ministrja.

7 koncesione të reja, Ibrahimaj: Jo domosdoshmërisht nisin vitin që vjen

“7 koncesionet e reja të parashikuara në projektbuxhet, jo domosdoshmërisht nisin vitin që vjen. Janë  një listë potenciale, që mund të vihen në zbatim, i kemi vënë në projektbuxhet me qëllim disiplinimin e koncesioneve. Për vitin që vjen për këto koncesione nuk është parashikuar mbështetje buxhetore, dhe mund edhe të mos fillojnë në 2022”./Monitor/