Buxheti 2025, Kurti: Nga janari rriten pagat në sektorin publik

Me buxhetin prej 3.6 miliardë euro në vitin 2025, Kryeministri i Kosovës, Albin Kurti, sot bëri të ditur se pagat e sektorit publik do të rriten nga janari i vitit 2025, duke filluar nga pagat më të ulëta me 55 euro. Dhe, rritja do të riaplikohet në korrik me 110 euro.

“Shprehur në vlerë monetare i bie që për të gjithë të punësuarit në sektorin publik pagat do të rriten nga 55 euro nga janari, dhe për 110 euro nga muaji korrik i vitit 2025,” tha Albin Kurti duke sqaruar se rritja do të bëhet duke filluar nga ata që kanë rrogat më të ulëta, për të balancuar pagat.

“Duke pas parasysh nevojën për të mbështetur më së shumti ata që kanë paga më të ulëta, sidomos në këtë kohë kur i gjithë globi po përballet me kosto të rritur të jetës, ne kemi shkuar në maksimumin e lejuar në rritjen buxhetore për pagat dhe kemi vendosur mos ta rrisim vlerën e koeificentit, por ta rrisim koeficientin për një njësi. Vlera e koeficientit mbetet 110 euro, mirëpo rritet sasia e koeficientëve për një njësi. Duke filluar nga janari i vitit të ardhshëm nga 0.5 njësi, pastaj nga korriku i vitit të ardhshëm edhe për 0.5 njësi,” tha Kryeministri i Kosovës duke vlerësuar se me këtë vendim të rritjes së pagave ulet hendeku mes pagës më të lartë e më të ultë.

“Për mësuesin, policin, ushtarin, infermierin, zjarrfikësin rritja në përqindje do të jetë prej 18-20 përqind, kurse për pozitat më të larta do të jetë 6 deri në 7 përqind. Kostoja vjetore do të jetë rreth 120 milionë euro, e që bashkë me rritjen e pensioneve dhe shtesat e fëmijëve e sjellë totalin në 280 milionë euro më shumë në xhepat e qytetarëve.”

Ndërsa ministri i Financave, Hekuran Murati, tha se rritja e pagave po bëhet në mundësitë maksimale. Sipas tij, qëllimi ka qenë që rritja të ndodhë në vlerë absolute dhe jo në mënyrë proporcionale, që të bëhet një balancë mes pagave.

Kryeministri Albin Kurti duke bërë të ditur se buxheti për vitin 2025 është 3.6 miliardë euro ai tha se prishmëria për Prodhimin e Brendshëm Bruot për vitin e ardhshëm është mbi 11 miliardë euro.

 “Të hyrat buxhetore të projektuara janë 3.3 miliardë euro, kjo është për 90% më e lartë sesa niveli në vitin 2020 para qeverisjes sonë. Nëse e krahasojmë me vitin parapandemik është 74% më e lartë. Për vitin 2025 buxheti i planifikuar për shpenzim është mbi 3.6 miliardë euro, që krahasuar me vitin 2020 është për 60% më i lartë,” tha Albin Kurti duke shtuar se rritja e të hyrave buxhetore është ndikuar nga luftimi i kontrabandës, shtrëngimi i kontrollit në pika kufitare dhe shtrirja e barrës tatimore te të gjithë.

Në anën tjetër, ministri i Financave, Hekuran Murati, tha se nesër mund të thirret mbledhja për të vazhduar me caktimin e seancës së Parlamentit për ta votuar buxhetin. 

“Ne kemi numrat në Kuvend, kemi ende shumicën me gjithë lëvizjet e fundit që kanë ndodhur. Gjithsesi besoj se Ligji për Buxhetin, duke qenë shumë i rëndësishëm për qytetarët e vendit, nuk do të bëhet pjesë e betejës politike apo fushatës zgjedhore, sepse është ligj që duhet patjetër të kalojë në mënyrë që të ketë vazhdimësi në funksionimin e shtetit.”