“Call Center”, kreu i SPAK: Aktivitet kriminal i shtrirë në disa shtete, i bëj thirrje shqiptarëve…

Operacioni “Call Center” me arrestimin e katër personave dhe gjashtë të tjerëve në kërkim në Shqipëri për aktivitetin kriminal i cili është shtrirë në disa shtete, për autoritetet e Spanjës për të cilët viktima të mashtrimit kryesisht ishin shtetas spanjollë quhet operacion i sukseshëm, ndërsa kreu i SPAK, Arben Kraja, i bëri thirrje shtetasve shqiptarë të mos përfshihen në këto aktivitete që për momentin sjellin përfitim por kanë pasojë dënimin dhe ndëshkueshmërinë.

“Aktivitet kriminal të shtrirë në disa shtete. Të ndërgjegjshëm e të vendosur për të hetuar këto aktivitete, sepse mendojmë se janë të rrezikshme për të gjitha shtetet, për shoqërinë nga pasojat që sjelli dhe skemat e pastrimit të parave. U bëj thirrje shtetasve shqiptarë qoftë në nivel biznesi apo personash të punësuar, të mos përfshihen në këto aktivitete që për momentin sjellim përfitim por kanë pasojë dënimin dhe ndëshkueshmërinë,” tha kreu i Prokurorisë së Posaçme Kundër Korrupsionit dhe Krimit të Organizuar, SPAK, Arben Kraja, duke sqaruar se operacioni ndaj Call Centerave ishte një operacion që përfshinte disa shtete dhe që u krye pas një hetimi 1 vjeçar.

Ndërkohë koloneli i Gardës Civile spanjolle, Emmanuel Martin u shpreh se operacioni i kalonte kufijtë e Shqipërisë dhe viktimat e mashtrimit ishin kryesisht shtetas spanjollë.

“Unë jam Koloneli Emanuel Martin, shefi i hetimit kriminal i Gardës Civile spanjolle. Falenderoj të gjitha autoritetet këtu. Në mënyrë që t’ju transmetojmë suksesin e arritur. Viktimat spanjolle të cilat zbuluan këta kriminelë. Bëhet fjalë për një operacion që i kalon kufijtë e Shqipërisë. Ky operacion shtrihet edhe në Maqedoninë e Veriut dhe vende të tjera,” tha Martin ndërsa një tjetër përfaqësues i autoriteteve spanjolle është shprehur se e rëndësishme është t’i mësojnë qytetarët se si të mbrohen nga krimi kibernetik.

“Falenderoj prokurorinë dhe auritetet. Krimi kibernetik nuk ka kufij. Forma kryesore është të mësojmë njerëzit se si luftohet ky krim. Duhet të luftojmë edhe jashtë kufijve të vendeve tona. Policia me prokurorinë tonë ka luajtur një rol shumë të madh, për të bashkëpunuar edhe me policitë e tjera për të parandaluar këtë lloj krimi.”

Ndryshe, janë katër persona të arrestuar dhe gjashtë të tjerë në kërkim pas operacionit të SPAK dhe Policisë Shqiptare në bashkëpunim me ekspertët e krimeve kibernetike të policisë spanjolle Guardia Civil dhe Mossos d’Esquadra dhe Byronë Kombëtare të Hetimit.

Në hetimet e SPAK rezultoi se të dyshuarit i përkasin një rrjeti kriminal me emërtimin, OCG, që besohet të jetë i përfshirë në fushën e mashtrimit kompjuterik, nëpërmjet sistemeve kompjuterike duke përdorur për vjeljen e të ardhurave, kriptovalutat etj. Rrjeti kriminal përdori dhjetëra qendra telefonike, “Call Center”, në disa vende dhe qindra platforma në rrjet, për të kryer mashtrimet kompjuterike.

Të dyshuarit u paraqitën si ndërmjetës që do të ndihmonin investitorët të fitonin shuma të mëdha parash me investime të vogla. Në realitet grupi i strukturuar kriminal i mashtroi viktimat, duke fituar besimin e tyre në internet dhe duke ngritur profesionalisht qendra telefonike, “Call Center”, ose mënyra të tjera të të ashtuquajturës inxhinieri sociale. Kjo i inkurajoi viktimat të investonin nëpërmjet platformave të internetit të kontrolluara nga grupi i strukturuar kriminal, duke shkaktuar humbjen e shumave të mëdha të parave.

Disa nga platformat e përdorura janë: Absolut Global Markets, AurumPro, Finaxis, SNP Broker, CapitalMarketsBanc, FXNobel, Cryptokartal, Centrobanc, GoldmanBank, TopTradePro, GSI-MARKETS etj.

Si rezultat i këtij operacioni ndërkombëtar, në Shqipëri janë kontrolluar qendrat e thirrjeve apo ambiente në Tiranë, Elbasan dhe Vlorë të cilat gjatë periudhës hetimore kanë pasur dhe ndryshime vendndodhjesh, emërtimesh por dhe bashkime më njëra tjetrën për efekt të fshehjes nga organet ligjzbatuese.

Po kështu janë kryer 11 kontrolle qendrash thirrjeje dhe banesa dhe janë arrestuar/ndaluar 4 shtetas të dyshuar (2 nga SPAK dhe 2 në bazë të kërkimit ndërkombëtar) si dhe janë shpallur në kërkim 6 shtetas të tjerë (3 nga SPAK dhe 3 në bazë të kërkimit ndërkombëtar), si organizatorë të këtij aktiviteti kriminal.