Cameron: Do ndihmojmë Kosovën me njohje të reja! Daçiç: Deklaratë hipokrite, meriton dënim të ashpër!

Pas deklaratës së Sekretarit të Jashtëm, David Cameron, në Prishtinë se Britania e Madhe do ta ndihmojë Kosovën për të marrë njohje të reja, ka reaguar ashpër Ministri i Jashtëm i Serbisë, Ivica Daçiç, duke e quajtur si deklarataë jashtëzakonisht hipokrite e cila meriton dënimin më të ashpër.

“Ai nuk e tha asnjë fjalë për Albin Kurtin dhe të ashtuquajturën Kosovë që refuzojnë ta zbatojnë Marrëveshjen e Brukselit për 11 vjet, e cila, ndër të tjera, u nënshkrua dhe u garantua në emër të Bashkimit Evropian nga britanikja Catherine Ashton,” tha sot Ivica Daçiç për Agjencinë e lajmeve të Serbisë, Tanjug duke shtuar se Serbia do të vazhdojë të jetë një faktor konstruktiv në dialog, por se ajo ka të drejtë t’i mbrojë interesat e veta kombëtare dhe shtetërore dhe integritetin e vet territorial.

“Unë do ta ftoja Cameronin, kur të kthehet në Londër, të dalë jashtë zyrës së tij dhe ta shikojë muralin që shfaq Britaninë me aleatët pas Luftës së Parë Botërore, ku Serbia dhe Belgjika shfaqen si vajza të vogla të varura nga fundet e Britanisë si mbrojtëse e tyre. Është koha, koleg Cameron, ta heqësh atë mural, që është histori, ose të mendosh për deklaratat e tua,” tha Ministri i Jashtëm i Serbisë, Ivica Daçiç.

Ndryshe, sot në Prishtinë, David Cameron theksoi se Britania e Madhe do ta ndihmojë Kosovën në aspiratat e saj duke përmendur këtu procesin e njohjeve të reja.

“Jemi përkrahës të mëdhenj të pavarësisë, sovranitetit dhe të drejtës së Kosovës për t’u njohur nga të tjerët si një vend i plotë, sovran dhe anëtar i familjes së kombeve.”

Gjatë qëndrimit në Kosovë, raporton RFE, Sekretari i Jashtëm i Mbretërisë Bashkuar, David Cameron, është takuar me me Presidenten e Kosovës, Vjosa Osmani, Kryeministrin Albin Kurti dhe Ministren e Jashtme, Donika Gërvalla.