Cameron në Prishtinë: Jemi këtu që t’iu mbështesim, t’iu promovojmë dhe t’iu ndihmojmë!
Jemi një përkrahës i madh i pavarësisë së Kosovës, sovranitetit tuaj dhe Kosova ka të drejtë që të njihet nga të tjerët si një vend i plotë sovran dhe anëtar i familjes së kombeve, tha Sekretari i Jashtëm i Mbretërisë së Bashkuar, David Cameron, në Prishtinë duke premtuar dhe njohjen e Kosovës në forumet ndërkombëtare,
“Jemi këtu që t’iu mbështesim, t’iu promovojmë dhe t’iu ndihmojmë në çdo mënyrë që ne mundemi. Keni pasur sfida të forta në korrupsion, por sfida kryesore është për të ndërtuar një shtet i cili është i sigurt për të gjitha komunitetet. Jemi një përkrahës i madh i pavarësisë së Kosovës, sovranitetit tuaj dhe Kosova ka të drejtë që të njihet nga të tjerët si një vend i plotë sovran dhe anëtar i familjes së kombeve. Sigurisht do t’ju ndihmojmë në betejën për t’u njohur në forume ndërkombëtare, që është e rëndësishme dhe e meritoni,” tha David Cameron pas takimeve me krerët e shtetit të Kosovës.
Në takim me Presidenten Vjosa Osmani, u diskutua për mbështetjen britanike të Kosovës si dhe sulmin e 24 shtatorit nga grupet terroriste serbe.
“Në takim u diskutua për raportet e shkëlqyera Kosovë-Mbretëri e Bashkuar, përkushtimin për thellim të bashkëpunimit ndërshtetëror, forcimin e pozitës ndërkombëtare të Kosovës, si dhe situatën e sigurisë në rajon e më gjerë,” thekson Zyra e Presidencës përmes një njoftimi duke shtuar se Presidentja Osmani ritheksoi rëndësinë e anëtarësimit të Kosovës në NATO, duke filluar me përfshirjen në Partneritetin për Paqe, si hap i domosdoshëm për të siguruar paqe dhe siguri afatgjate në rajon dhe më gjerë.
Presidentja Osmani foli në takim edhe për rëndësinë e anëtarësimit në Këshillin e Evropës për fuqizimin dhe avancimin e mëtejmë të të drejtave të njeriut.
“Në takim u diskutua edhe për situatën e sigurisë në rajon dhe më gjerë, me ç’rast Presidentja Osmani e informoi sekretarin Cameron për përpjekjet e vazhdueshme destabilizuese të Serbisë, përfshirë aktin e agresionit dhe aktin terrorist kundër Republikës së Kosovës më 24 shtator.”
Ndërsa Kryeministri i Kosovës, Albin Kurti, duke i uruar mirëseardhje Sekretarit të Jashtëm, David Cameron, u shpreh i lumtur që vitin 2024 po e fillon me një takim të rëndësishëm dypalësh me miken, partneren dhe aleaten e afërt të Republikës së Kosovës, Mbretërinë e Bashkuar
“Kryeministri Kurti e njoftoi Sekretarin Cameron me progresin dhe arritjet e Kosovës, veçanërisht në tri vitet e fundit, sa në aspektin ekonomik ashtu edhe demokratik e të sundimit të ligjit. Foli për sukseset dhe sfidat e vitit 2023 dhe përkushtimin e tij dhe Qeverisë së Republikës së Kosovës për zhvillim ekonomik krahas luftimit të krimit dhe korrupsionit, ngritje të mirëqenies së qytetarëve përmes punësimit dhe politikave të duhura sociale, dhe garantim të sigurisë dhe paqes në vend përballë sjelljes agresive dhe kërcënuese të Serbisë,” thekson Zyra e Kryeministrit përmes një njoftimi për takimin në të cilin u theksua dhe vlera e rëndësia e marrëdhënieve të forta bilaterale ndërmjet dy shteteve, dhe fuqizimi i raporteve të ndërsjella.
Albin Kurti falënderoi Sekretarin e Jashtëm Cameron për kontributin e tij sa ishte Kryeministër i Mbretërisë së Bashkuar dhe mbështetjen e vazhdueshme që ky shtet i ka dhënë Kosovës në çlirimin, pavarësimin, demokratizimin, zhvillimin e brendshëm dhe integrimin ndërkombëtar, dhe tash së fundmi në rritjen e sigurisë përgjatë kufirit me Serbinë me zbarkimin e 200 ushtarëve britanikë në tetor të vitit të kaluar në kuadër të misionit të NATO-s në Kosovë.
Sekretari i Jashtëm Cameron nga ana e tij shprehu mirënjohje për mikpritjen në këtë vizitë, që përveçse është e para e tij në Kosovë, është edhe e para për të jashtë vendit për vitin 2024, ku u shpreh krenar për mbështetjen që Mbretëria e Bashkuar i ka dhënë Kosovës dhe për vendimin dhe qëndrimin për ta njohur sovranitetin dhe pavarësinë e saj.
“Unë jam këtu për të përforcuar faktin që ne ju mbështesim juve. Duam që të ju ndihmojmë në rrafshin e sigurisë, atë të zhvillimit ekonomik, të qeverisjes dhe në të gjitha çështjet me të cilat përballeni. Kemi qenë mbështetës afatgjatë të Kosovës dhe do të vazhdojmë të jemi të tillë,” ishte i qartë David Cameron në takim me Kryeministrin e Kosovës, Albin Kurti, i cili ishte i shoqëruar nga Zv/Kryeministrja dhe ministrja e Punëve të Jashtme dhe Diasporës, Donika Gërvalla, ministri i Punëve të Brendshme, Xhelal Sveçla, ministrja e Ekonomisë, Artane Rizvanolli, ministri për Komunitete dhe Kthim, Nenad Rashiç, Kryetarja e Grupit Parlamentar të Lëvizjes Vetëvendosje, Mimoza Kusari Lila dhe Ambasadori i Kosovës në Mbretëri të Bashkuar, Ilir Kapiti.
Pas takimit me Presidenten dhe Kryeministrin e Kosovës, Sekretari i Jashtëm i Mbretërisë së Bashkuar, David Cameron, zhvilloi një takim me ministren e Punëve të Jashtme dhe Diasporës, Donika Gërvalla, takim pas të cilit në një konferencë për media u shpreh se një nga gjërat më të rëndësishme në arenën ndërkombëtare është stabiliteti i Ballkanit Perëndimor dhe Britania e Madhe është e gatshme për të vazhduar ndihmën për Kosovën në këtë drejtim.
“Ne jemi krenarë me faktin se Britania luan një rol të madh në KFOR. Ne kishim mbi 600 trupa britanike këtu këtë vit. Ne jemi krenarë për trajnimin dhe mbështetjen që po u japim forcave tuaja të armatosura dhe suksesin e madh që ata kanë pasur në stërvitje në Mbretërinë e Bashkuar. Kemi folur për sigurinë, për ekonominë tuaj e cila po tregon rritje të mirë këtë vit dhe ne duam të bëjmë më shumë për t’ju ndihmuar ekonomikisht, për t’ju ndihmuar të siguroni punë dhe mjete jetese për njerëzit tuaj. Dhe ne kemi folur për luftën tuaj kundër korrupsionit dhe atë që po bëni për të vendosur sundimin e ligjit dhe për të ndërtuar qeverisjen e mirë këtu në Kosovë,” tha shefi i diplomacisë britanike duke u shprehur qartë se Mbretëria e Bashkuar është përkrahëse e Kosovës, e cila ka të drejtë të jetë pjesë forumeve ndërkombëtare.
Ministrja e Punëve të Jashtme, Donika Gërvalla, nga ana e saj se e informoi Sekretarin e Jashtëm Cameron për zhvillimet në vend dhe falënderoi atë për ndihmën e dhënë Kosovës nga Britania e Madhe si para ashtu edhe gjatë luftës.
“Duke e njoftuar për agresionin e Serbisë ndaj Kosovës, vitin e kaluar me 24 shtator, në veri të vendit, shpreha mirënjohjen për reagimin e shpejtë dhe dërgimin e trupave shtesë të Mbretërisë së Bashkuar , duke e vlerësuar këtë si një sinjal të domosdoshëm për ruajtjen e paqes dhe stabilitetit, jo vetëm në Kosovë por në tërë rajonin,” tha Donika Gërvalla në konferencën e përbashkët për media duke shtuar se ekziston një konsensus që Kosova të jetë pjesë e Perëndimit.
“Perëndimi ka qenë gjithnjë i suksesshëm atëherë kur ka pasur qëndrim të qartë dhe të vendosur. Ka qenë i suksesshëm kur ka vepruar me vendosmëri përballë një Moske agresive. Ekziston një konsensus gjithëshoqëror që Kosova është pjesë e Perëndimit. Mbi 90 për qind e mbështesin Kosovën në integrimet brenda BE-së.”
Ndryshe, kjo është vizita e parë e një Sekretari të Jashtëm të Mbretërisë së Bashkuar në Kosovë që prej vitit 2016. Në Prishtinë, Sekretari i Jashtëm, David Cameron, shoqërohet nga I dërguari i Posaçëm i Mbretërisë së Bashkuar për Ballkanin Perëndimor, Lord Stuart Peach dhe Ambasadori britanik në Kosovë, Nicholas Abbott.
