Çavușoğlű: Gylenistët në nivele të larta shtetërore në Shqipëri. Duam ekstradimin…
Ministri i Jashtëm i Turqisë, Mevlűt Çavușoğlű pas takimit me homolgun e tij shqiptar, Ditmir Bushati në Tiranë tha se elementët e organizatës FETO, që Turqia e quan terroriste e që njihen si “gylenist”, kanë depërtuar jo vetëm në sistemin arsimor por dhe në nivele të larta shtetërore në Shqipëri. Ai tha se Turqia i ka vënë në dispozicion shtetit shqiptar, listën me emrat dhe pret që shteti që ai e quajti “mik” ta bëjë sa më parë ekstradimin e tyre.
“Është e dobishme të shikohet si funksionon kjo organizatë FETO. Ajo bëri një grusht shteti në Turqi. Atë natë 251 shtetas turq u masakruan, më shumë se 2000 u plagosën. Është një organizatë terroriste që përdori tanket kundër popullit tonë. Bombarduan parlamentin dhe dy pika të rëndësishme të Stambollit dhe Ankarasë por falë guximit të popullit dhe urtësisë së presidentit tonë Erdoan e mposhtëm këtë grusht shteti,” tha shefi i diplomacisë turke duke shtuar se sikur të kishte fituar ky grusht shteti edhe ju mund të parashikoni çfarë do të kishte ndodhur atë natë.
Por Shqipëria pas atij grushti shteti ka treguar një shembull të gjallë solidariteti ndaj Turqisë, por ka një të vërtetë. Ka një strukturë FETO-iste tepër serioze në Shqipëri në çdo fushë. Si në vendet e tjera ata kanë përdorur sidomos sistemin arsimor dhe kanë depërtuar shumë mirë brenda në sistemin shtetëror. Nuk mund të hedhin më hapa të tjerë. Kjo organizatë terroriste është një kërcënim i hapur dhe i madh kundër Turqisë. Ata nuk janë vetëm e dimë mirë si veprojnë ata. E dimë që këtu ka elementë të FETOS dhe presim diçka nga Shqipëria mike. Presim që të mbyllen institucionet që zhvillojnë veprimtari antiturke në Shqipëri. Kjo është pritshmëri e jona.”
Bushati nuk foli për ekstradimin por tha se se çështje të tilla zgjidhen në rrugë diplomatike dhe jo me konferenca shtypi.
“Shqipëria ka qenë një nga vendet e para që është solidarizuar me çfarë ndodhi në Turqi, në rrethanat e grushtit të shtetit, por nga ana tjetër është vend anëtar i NATO-s, kandidat për në BE, ka aderuar në disa dokumente të rëndësishme ndërkombëtarë në fushën e ekstradimit dhe çdo politikë e tillë ndiqet në rrugë diplomatike dhe asesi në konferenca shtypi.”
Por Çavușoğlű tha se shteti turk ka dorëzuar listën me emrat e FETO dhe pret ekstradimin:
“Pas tentativës për grusht shteti, pritshmërinë tonë nga Shqipëria e kemi transmetuar dhe përcjellë në mënyrë të qartë të gjitha kërkesat, hapat që duhen hedhur për eliminimin e FETO-s këtu. Eliminimine veprimtarisë kundër Turqisë që zhvillohet këtu dhe gjithmonë kemi dhënë lista me emrat e tyre miqve tanë shqiptarë. Gjithashtu janë dhe personat që kërkojmë ekstradimin e tyre. E kemi bërë këtë kërkesë dhe në mënyrë zyrtare në kuadër të së drejtës ndërkombëtare. Kemi paraqitur vendimet përkatëse të gjykatës, dokumentet përkatëse, presim që të realizohen. Kjo është e rëndësishme për ne por dhe për Shqipërinë mike. Fondacioni Maarif ka marrë përsipër, meqë pa rrezkun e FETO ka marrë shumë shkolla në vende të ndryshme. Ose do të marrë shkollat ekzistuese ose në bashkëpunim me ministrinë e Arsimit do të hapë shkollat e veta,” tha ministri i Jashtëm i Turqisë, Mevlűt Çavușoğlű duke premtuar ngritjen e shkollave të reja në Shqipëri ndërsa kërkon mbylljen e institucioneve antiturke në Shqipëri.
