Çdo projekt me oponencë teknike, miratohen tarifat që do të paguajnë bizneset
Çdo projekt ndërtimi duhet që të vlerësohet nga institucionet shtetërore përkatëse sa i takon përmbushjes së kritereve të projektimit apo rregullave teknike të ndërtimit.
Kjo nënkupton atë që njihet si oponencë teknike. Konkretisht me një vendim të pak ditëve më parë të qeverisë që tashmë është publikuar në Fletoren Zyrtare duke hyrë kështu në fuqi, janë miratuar edhe tarifat për çdo projekt duke pasur në bazë vlerën e tij totale.
Vendimi përcakton si fillim se Oponenca teknike kryhet për projektin për miratimin e lejes së ndërtimit dhe për projektin e zbatimit, në varësi të llojit të objektit dhe punimeve ndërtimore, sipas përcaktimeve në nenin 6, të ligjit nr. 8402, datë 10.9.1998, “Për kontrollin dhe disiplinimin e punimeve të ndërtimit”, të ndryshuar.
“Oponenca teknike ka për qëllim kontrollin e projektit në përputhje me detyrën e projektimit, me dokumentet e planifikimit e të kontrollit të zhvillimit, me rregullat teknike të ndërtimit, kushtet teknike, standardet shqiptare në fuqi ose standardet evropiane kur mungojnë standardet shqiptare të përdorura në projekt, si dhe me legjislacionin në fuqi që rregullon veprimtarinë e ndërtimit në Republikën e Shqipërisë” thuhet në vendim.
I njëjti saktëson edhe fushat që kanë detyrimin e oponencës.
Oponenca teknike kryhet për studim-projektim në fushat:a) sociale, kulturore, shëndetësore, arsimore, shkencore, sportive dhe varreza; b) infrastrukturore; c) hidrike; ç) e transmetimit të energjisë; d) e rrjeteve inxhinierike; dh) e grumbullimit e të trajtimit të mbetjeve; e) e banimit dhe shërbimit; ë) industriale; f) bujqësore; g) financiare; gj) administrative;h) akomoduese dhe çlodhjeje.
Tarifat për oponencën
Vendimi sqaron se oponenca teknike zhvillohet nga institucionet shtetërore respektive për secilën fushë kundrejt një tarife.
Kështu tarifa e oponencës për projektet e veprave të ndërtimit llogaritet si përqindje mbi tarifën e projektimit ku kostot e llogaritshme merren për tipologjinë e shërbimit. Tarifa e projektimit për llogaritjen e oponencës merret në vlerën sipas përcaktimeve në VKM-në nr. 354, datë 11.5.2016, “Për miratimin e manualit të tarifave për shërbime në planifikim territori, projektim, mbikëqyrje dhe kolaudim”.
“Fazat për llogaritjen e tarifës merren nga faza I deri në faza VI për të gjitha tipologjitë e shërbimeve, ndërsa për punimet e nëntokës dhe punimet e themeleve merren nga faza I deri tek faza III, sipas përcaktimeve në VKM-në nr. 354, datë 11.5.2016, “Për miratimin e manualit të tarifave për shërbime në planifikim territori, projektim, mbikëqyrje dhe kolaudim”.
Tarifa e oponencës për ndërtime me kosto të llogaritshme nën 50 milionë lekë janë në nivel rritës e shtuar me koeficientin e ndryshimit, për ndërtesa me kosto të llogaritshme nga 50~300 milionë lekë tarifat ndërmjetëse merren me interpolim linear, ndërsa mbi 300 milionë lekë janë të pandryshueshme.
Tarifa për oponencë që zhvillohet në dy faza, oponencë për projektin e marrjes së lejes dhe oponencë për projektin e ndërtimit për fazën e dytë llogaritet me normat në përqindje të aplikueshme për fazën e shërbimit të përcaktuara në pikën 2 të aneksit 1 të këtij vendimi, duhet të reduktohen me 50%.
Në raste të ndryshme dhe për objekte të rëndësisë së veçantë, kur oponenti kryen oponencën edhe të ndryshimeve të projektit gjatë zbatimit të punimeve, tarifat rritet me 20%”, thuhet një vendim.
Tarifa në përqindje për oponencën i referohen kostove të llogaritshme sipas tabelës./Monitor/
