Çekia hap qendrat tregtare dhe restorantet

Qeveria e Çekisë sot ka paralajmëruar planin e hapjes së qendrave tregtare dhe restoranteve në shtatë javët e ardhshme në mënyrë që të zgjohet ekonomia e cila u ndal nga pandemia e koronavirusit.

Dyqanet e vogëla do të hapen më 20 Prill, dyqanet e mëdha më 11 Maj, ndërsa restorantet dhe qendrat tregtare më 8 qershor, ka bërë të ditur qeveria çeke.

Por Ministri i Shëndetësisë, Adam Vojtech, tha se plani varet nga respektimi i masave higjienike dhe se është i kushtëzuar me shpejtësinë e përhapjes së koronavirusit.

Çekia me 10.7 milionë banorë ishte ndër shtetet e para evropiane që shpalli gjendjen e jashtëzakonshme në muajin mars. Praga zyrtare ka marrë masat më të rrepta në jetën publike qysh kur ishin vetëm 200 të infektuar.

Deri më sot në Çeki janë infektuar 6.100 ndërsa betejën e kanë humbur 161 të prekur me koronavirus.

Masat, sipas qeverisë, ka bërë që numri i rasteve të reja të ulet në pak se 300 për 10 ditët e fundit ndërsa numri i të shtruarve në spital nuk ka kërcënuar kapacitetet e sistemit shëndetësor.

Plani i qeverisë çeke parashikon hapjen e shkollave, kryesisht për provime, deri sa shkolla tradicionale nuk do të fillojnë para vitit të ri shkollor në muajin shtator.