Çelja e negociatave me BE, Michel shpreson: Shqipëria i ka përmbushur të gjitha kushtet!

Ashtu siç paralajmëroi dje Kryeministri Edi Rama, sot Presidenti i Këshillit Europian, Charles Michel, në Tiranë e pranoi se Shqipëria i ka përmbushur të gjitha kushtet për të nisur bisedimet me BE-në por janë 27 krerët e Bashkimit Europian që do të vendosin për konferencën e parë, për të cilën Michel pas takimit me Ramën tha se vetëm shpreson se do merret vendimi i duhur dhe i drejt

Ndërsa Kryeministri Edi Rama shtoi se gjatë takimit me Presidentin Michel u folur për mbledhjen e Këshillit Evropian, Ballkanin e Hapur dhe sfidat e brendshme të rajonit dhe për reformat në vend.

“Folëm me Presidentin Michel për situatën e përgjithshme dhe për angazhimet, por edhe për sfidat në raport me luftën në Ukrainë. Folëm patjetër dhe besoj se ai do të komunikojë vetë në detaje për procesin në vigjilje të Këshillit Europian kur dihet që Shqipëria dhe Maqedonia e Veriut janë në axhendë për çështjen e hapjes së bisedimeve.

Folëm për Ballkanin e Hapur, për të gjithë sfidat e brendshme të rajonit dhe sigurisht folëm edhe për reformat në vend. Folëm për Reformën në Drejtësi që po jep fryte. Të gjithë e ndoqën dje operacionin shumë domethënës të policisë speciale dhe Policisë së Shtetit për të goditur një rrjet kriminal. Operacioni ishte shembull kuptimplotë për të vënë para drejtësisë njerëzve pavarësisht lidhjeve politike që tregon se jo vetëm jemi në rrugën e duhur por kemi hedhur hapa domethënës edhe në krahasim me vende që i kanë hapur negociatat,” tha Edi Rama pa ndonjë entuziazëm që pret nga takimi i krerëve të BE ndërsa Michel fillimisht për ta ngushëlluar tha se që nga vizita në fillim 2020 shumë gjëra kanë ndryshuar.

“Një gjë nuk ka ndryshuar dhe nuk do ndryshojë kurrë angazhimi ynë për integrimin tuaj në BE. Sot momenti për t’u takuar me një mik dhe aleat të vërtetë. Ne vazhdojmë të rrisim presionin ekonomik ndaj Rusisë, dëshiroj t’ju falënderoj për punën tuaj. Ju keni qenë një partner i besueshëm dhe një mik dhe aleat i vërtetë.

Ne diskutuam dhe marrëdhëniet mes Shqipërisë dhe BE-në. BE mbetet financuesi më i madh për Shqipërinë, duhet të japim energji të reja për integrimin.

Ne duhet të bëjmë përshpejtimin e integrimit. Ne do të kemi një takim të 27 udhëheqësve të BE-se me ju dhe vendet e Ballkanit Perëndimor. Shqipëria i ka përmbushur të gjitha kushtet për të nisur bisedimet me BE dhe duhet konferenca e parë duhet të mbahet sa më parë. Restaurimi i mozaikut është një simbol i fuqishëm i trashëgimisë së Shqipërisë dhe bashkëpunimin me BE-në,” tha Presidenti i Këshillit Evropian duke përfunduar:

“Javët në vijim do jenë kyçe, shpresojmë se do marrim vendimet e duhura dhe të drejta.”