Çelja e negociatave, Presidentja e KE: Metodologjia e re i hap rrugën Shqipërisë dhe Maqedonisë së Veriut

Pas takimit joformal me liderët e Ballkanit në Bruksel, ku u diskutua metodologjia e re e zgjerimit të Bashkimit Europian dhe përgatitjet për Samitin e BE-së për Ballkanin Perëndimor që do të zhvillohet në muajin maj të këtij viti në Zagreb, Presidentja e Komisionit Europian, Ursula von der Leyen duke përsëritur se integrimi i Ballkanit Perëndimor është një prioritet tha se metodologjia e re i hap rrugë Shqipërisë dhe Maqedonisë së Veriut për të çelur negociatat për anëtarësim në BE.

“Sonte, siç e dini kishim prioritet Ballkanin Perëndimor në Komision dhe e dini që është në interesin e përbashkët ta kemi sa më afër Bashkimit Europian Ballkanin Perëndimor. E dini që kemi rishikuar metodologjinë tonë dhe pas rishikimit kjo metodologji duhet të krijojë dhe rifitojë besimin e ndërsjelltë te procesi sepse përshpejton status quo-n e reformave dhe nga ana tjetër krijon prespektivë të besueshme për Ballkanin Perëndimor që t’i bashkohen në të ardhmen BE-së. Gjithashtu i hap rrugën Maqedonisë së Veriut dhe Shqipërisë për të nisur negociatat për anëtarësim në BE mundësisht para Samitit të Zagrebit,” tha Ursula von der Leyen ndërkohë për Samitin tha se po përgatitet një paketë investimesh:

“Në lidhje me samitin po përgatisim një paketë investimesh nga Komisioni dhe shpresojmë që Këshilli të japë dritën jeshile në këtë aspekt. Nesër do të mbahet Konferenca e donatorëve për Shqipërinë me qëllim që të ngremë fonde për rindërtimin pas tërmetit të rëndë që ka goditur Shqipërinë.”

Ndryshe, në takim me liderët e Ballkanit përveç Presidentes së Komisionit Europian, Ursula von der Leyen, ishin edhe  Presidenti i Këshillit Europian, Charles Michel, Kryeministri i Kroacisë si kryesuese e radhës së BE, Andrej Plenkoviç, dhe Përfaqësuesi i Lartë për Politikë të Jashtme dhe Siguri pranë BE, Joseph Borrell.

Nesër, gjashtë liderët e Ballkanit Perëndimor sërish do të takohen në Bruksel për Konferencën Ndërkombëtare të Donatorëve për Shqipërinë, e cila zhvillohet në Komisionin Europian. Qëllimi i konferencës është mbështetja e përpjekjeve të rindërtimit në Shqipëri pas tërmetit që goditi vendin në nëntor të vitit të kaluar.

Në prag të kësaj Konference, Kryeministri Edi Rama u shpreh:

“Për ne, Shqipërinë, nesër është dita e madhe, sepse kemi konferencën e donatorëve për përballimin e situatës pas tërmetit dhe po shpresoj shumë se do të gjejmë mjaftueshëm solidaritet e mbështetje për të ecur përpara me rindërtimin.”