Ceremonia në Bularat, 300 grekë nuk lejohen të hyjnë në Kakavijë

Sot në Gjirokastër policia kishte masa të shtuara për shkak të ceremonisë së dyzetave të Kostandinos Kacifas në Bularat.

Raportohet se janë 300 persona që janë kthyer dhe nuk lejohet asnjë shtetas grek, pavarësisht qëllimit, që të kalojë pikën kufitare të Kakavijes.

Ka përforcim të forcave policore edhe përgjatë kufirit dhe kontrolle të imtësishme të të gjitha makinave përgjatë aksit Gjirokastër – Kakavijë.

Postoblloku i policisë ndodhet mes Lazaratit dhe Dervicianit, fshatit të parë minoritar.

Mësohet se janë 12 shtetas grekë që janë shoqëruar në komisariat e policisë për verifikim nga të dyja pikat doganore, Kakavijë dhe Qafë Botë.

Ndryshe, sot janë mbajtur dy tubime në këtë zonë, një në Bularat për nder të Konstandinos Kacifas dhe tjetri ne Gjirokastër, ndërkohë që policia ka dhënë leje për zhvillim të një tubimi paqësor të “njëgrupi patriotësh”.

Mësohet se organizatorët e këtij tubimi vendosën që ta zhvendosin protestën në zonën që njihet si  “Ura e lumit” ndërkohë që policia e Gjirokastrës ka dhënë leje për organizimin e tubimit vetëm në “Sheshin e Çerçizit”.