Çështjet administrative në Gjykatën e Lartë, rritje me 133%

Funksionimi i Gjykatës Administrative të Apelit me trupë të plotë gjatë vitit 2024 duket se ka sjellë si efekt zinxhir rritjen e numrit të çështjeve që regjistrohen për të vijuar betejën në Gjykatën e Lartë. Kjo e fundit raportoi se çështjet e reja u rritën me 58 për qind gjatë vitit të shkuar krahasuar me vitin 2023.

“Edhe pse krahasimisht në ulje me prurjet e viteve 2019-2020, përkatësisht me 63 për qind dhe 26 për qind, për herë të parë kemi një ndryshim kaq të madh në numrin e çështjeve të reja administrative të përcjella pranë Gjykatës së Lartë.

Krahasuar me vitin 2022 si viti me numrin më të ulët të çështjeve të reja administrative të regjistruara, kjo rritje llogaritet me 133 për qind. Një rritje e tillë mund t’i atribuohet funksionimit tashmë të Gjykatës Administrative të Apelit me trupë të plotë gjyqësore prej 13 gjyqtarësh dhe rritjes së volumit të vendimmarrjes atje “nënvizon Gjykata e Lartë në raportimin e saj vjetor.

Referuar statistikave të kësaj Gjykate në rritje më të lehtë kanë qenë edhe çështjet civile të regjistruara pranë saj. Konkretisht kjo rritje ishte me 8 për qind në krahasim me vitin e kaluar 2023.

“Nëse krahasohen me vitin 2022 numri i çështjeve të reja të regjistruara në vitin 2024 është 2 për qind më shumë se në vitin 2022 dhe 38 për qind më pak se në vitin 2021. Krahasuar me vitin 2019 dhe 2020 kjo përqindje është përkatësisht 70 për qind dhe 36 për qind më pak,” thuhet në dokument.

Sipas dokumentit çështjet penale qëndrojnë pak a shumë konstante në prirje kryesisht në rënie, me një ulje të lehtë prej 7 për qind në krahasim me vitin 2023 dhe 16 për qind në krahasim me vitin 2022. Në krahasim me vitin 2019, ulja llogaritet me 30 për qind.

Në total çështjet administrative të regjistruara në vitin 2024 zënë një volum prej 35 për qind të ngarkesës së gjykatës, çështjet civile zënë një volum prej 33% ndërsa ato penale zënë një volum prej 32 për qind. /Monitor/