Çfarë halli ka Edi Rama me Amerikën?!

nga Agim Popoci

Kryeministri Edi Rama sërish inskenoi një JO për Amerikën duke mos sjellë risi në marrëdhëniet e partisë së tij kriminale me SHBA, por që u bë shqetësuese për shqiptarët edhe kur ky pushtet është në grahmat e tij të fundit.

Çfarë halli ka Edi Rama me Amerikën kur ndërsen Rudinën dhe Myslymin kundër Marrëveshjes së 5 Qershorit për Reformën Zgjedhore, kur ajo është firmosur në prezencë të Ambasadores amerikane, Yuri Kim; Dhe cili është qëllimi i degradimit të kësaj Marrëveshje, nga dora vetë, Edi Rama!

Pse Edi Rama pas dështimit të takimit të Këshillit Politik dje, dhe sot pas vizitës së Ambasadores së SHBA në Tiranë, Yuri Kim, në Kryeministri, ai poston një video-mesazh ku e bënë të qartë se hapja e listave përfshin qytetarët edhe në zgjedhjen e deputetëve, jo vetëm të partive, dhe ata do të hapin listat sepse Partia Socialiste do atë që duan qytetarët!

Jo Amerikës nga Edi Rama nuk është risi që nga koha kur ishte në opozitë, dhe më keq kur erdhi në pushtet!

Edi Rama organizoi protesta kundër anëtarësimit të Shqipërisë në NATO edhe pse bazuar në situatën në të cilin ishin Forcat e Armatosura, të vetmit që duhet të festonin në ato rrethana ishin shqiptarët. Mburoja politiko-ushtarake e Aleancës më të fuqishme në botë që përfitoi Shqipëria falë Amerikës, bëri krenar çdo shqiptarë përveç Edi Ramës i cili vazhdon dhe jeton me ëndrrën e Paktit të Varshavës, që flenë në zemrat komuniste shqiptare edhe sot 12 vjet pas anëtarësimit në NATO. Mjafton vetëm fakti nga Mali i Zi, shtet i cili e ka për nderë që është anëtarë i NATO-s dhe këtë e shprehë edhe në spotet e promovimit të turizmit; Duke promovuar vlerat turistike të këtij shteti, Mali i Zi thotë se është edhe vend i sigurt sepse është anëtar i NATO-s. Ndërkohë, Edi Rama, që nga koha që ishte në opozitë, e kishte dhe e ka për turp, madje në ligjërimin e tij nuk e përmend asgjëkundi fjalën NATO!

Asgjë nuk ndryshoi edhe me ardhjen në pushtet. Madje vetëm disa ditë pas ardhjes në pushtet kur kishte arritur Marrëveshje me Ambasadorin e SHBA në Tiranë, për asgjësimin e armëve kimike siriane, ky mjeshtër i protestave organizoi në nëntorin e vitit 2013 një lëvizje anti-amerikane që nuk ishte parë ndonjëherë në këtë rajon. U aktivizuan shoqëria civile, sajoi dhe një aleancë kundër plehrave që e pagëzoi Aleanca Kundër Importit të Plehrave, mori nxënës dhe studentë dhe i ndërseu kundër Amerikës duke organizuar dhe një protestë para Ambasadës së SHBA në Tiranë, për të kulmuar me JO-në e kryeministrit Edi Rama për Amerikën dhe ndihmën e saj për Shqipërinë që ishte dakordësuar, 100 mln $.

Kjo dramë e Edi Ramës u quajt ndërgjegjësim qytetar, por këtyre “qytetarëve” nuk u tha njeri se kishim të bëjmë me një asgjësim të sigurt të armëve kimike siriane nga po ata amerikanë, që në vitin 2007 kishin asgjësuar armë kimike shqiptare në rajonin e Qafë Mollës; Gjithashtu, këta “qytetarë” nuk i sqaroi njeri, se mirë Edi Rama i tha jo Amerikës, por ato armë kimike u asgjësuan në Itali dhe ky ishte shteti që përfitoi ndihmën financiare!

Erdhën zgjedhjet Presidenciale në Amerikë dhe Edi Rama jo si vëllai i Olsit por si Kryeministër i Shqipërisë foli kundër kandidatit për President Donald Trump dhe këtë e përsëriti edhe në një intervistë për pikën e tij të kontaktit me UDB-n, Baton Haxhiu:

“Unë e kam thënë hapur atë që e mendoj për Donald Trumpin dhe nuk e kam fare problem që ta përsëris as këtu, as kudo që të jetë, as shqip e as anglisht, që Donald Trumpi është kërcënim për Amerikën dhe nuk diskutohet që është kërcënim për raportet shqiptaro – amerikane. Që i bie, mos e dhëntë Zoti që amerikanët ta zgjedhin për President. Do të ishte një president që i bën dëme të mëdha Amerikës, dhe do të ishte një kërcënim real për raportet shqiptare me Amerikën,” tha Rama ndonëse nuk  ishte dëgjuar një fjalor i tillë për Presidentin e Rusisë, Vladimir Putin, që është kërcënim për botën, raportet shqiptaro – amerikane dhe në veçanti për shqiptarët.

Dhe, vjen Reforma Zgjedhore e vitit 2020. Jo Lulzim Basha por nuk ka shqiptar që do ta besonte Edi Ramën pas mashtrimit që bëri me Marrëveshjen e 17 Majit 2017. Por, prezenca e Amerikës dhe angazhimi i Ambasadores Yuri Kim ndryshoi gjithçka. Marrëveshja e 5 Qershorit ishte një kompromis kompleks nga i cili të gjitha palët dolën optimiste se edhe e gjithë sistemi zgjedhor në të ardhmen mund të kurohet dhe në fund edhe të ndryshoj. Por, tullumbacja e optimizmit shpërtheu shumë shpejtë dhe nga ajo doli Myslymi! Rudina e shkretë u shkarkua me sms sepse kishte vënë firmën mbi Marrëveshjen e 5 Qershorit me idenë se kërkesat e reja nga llumi opozitar po vijnë me emërimin e kryetarit të ri të këtij llumi. U tha madje se Rudina e kishte firmosur Marrëveshjen nën presion por një detaj madhor pësoi shkarje; “Xhaxhat” e presionit janë po ata “xhaxha” evropian që i thanë kohë më parë rri në parlament dhe tradhtoje Lulin sepse i duhej Ramës!

Gjithsesi, kërkesat e Myslymit nuk janë të panjohura si për Opozitën e Bashkuar ashtu edhe llumin opozitar që e ka lexuar Marrëveshjen e 5 Qershorit, por sot ato janë kërkesa që minojnë këtë Marrëveshje. Dhe jo vetëm kaq!

Komunistët e konvertuar në rilindas dhe llumi opozitar mund ta quajnë koincidencë, por ky është një silur që iu drejtua Amerikës dhe dështimit të saj si ndërmjetëse e kësaj Marrëveshje! Nëse kësaj i shtojmë edhe faktin se jemi në prag të zgjedhjeve presidenciale në SHBA, e ku rikandidon aq shumë i adhuruari i Kryeministrit Edi Rama, Presidenti Donald Trump, oreksi anti-amerikan i Ramës derdhet fare.

Deri më sot Edi Rama ende nuk është sqaruar për protestën Anti-NATO. Mirë nuk e do anëtarësimin në NATO po ku e donte Shqipërinë të anëtarësuar ky zotëri!

Deri më sot Edi Rama ende nuk është sqaruar se ku e ka atë qytetarin e ndërgjegjësuar dhe Aleancën për Importin e Plehërave kur plehrat futen nga të gjitha anët, ajr, detë dhe tokë. Madje në këtë kohë pandemie, ku është ky qytetari i ndërgjegjësuar që nuk po i vihet maska as me hir as me pahir; As me Akt Normativ as me gjobë, dhe qëllimi është po ai i vitit 2013 kur Edi Rama me këta qytetarë e donte jetën më të shumë se Amerikën!

Dhe, në fund, pasi u bë gaz i botës, deri më sot, Edi Rama nuk sqaroi se pse u dha urdhër Damian Gjiknurit dhe Rudina Hajdarit të firmosin Marrëveshjen më 5 Qershor. Ashtu, siç nuk po sqaron të paktën ata qytetarë që i manipuloi në nëntorin e vitit 2013 dhe jo vetëm: Çfarë halli ka me Amerikën!