Çfarë halli ka Edi Rama/ Pas aktorëve të gjallë që e përgënjeshtruan, kërkon ndihmë nga të vdekurit…
E bëri dhe miratoi “Ligjin Fusha” pa pyet njeri, hartoi projektin me Fusha sh.p.k. dhe filloi ta zbatoi pa pyet njeri, dhe për shtatë ditë e fundit po mundohet të bindë opinionin publik me deklaratat e aktorëve të ndryshëm se Kryeministri Edi Rama ka të drejtë!
Por, pas përgënjeshtrimit që i bënë ata që citoi, reagimi i sotëm i Kryeministrit Edi Rama duke cituar edhe regjisor të vdekur tregon momente aspak normale që po kalon Kryeministri!
Çfarë halli ka njeriu i gjithpushtetshëm dhe fatkeqësia e kombit shqiptar, Edi Rama?!
Citon edhe regjisorin e respektuar të Teatrit Kombëtar, tashmë të ndjerin Mihallaq Luarasi edhe pse ai askund nuk i jep të drejtë Edi Ramës, siç nuk i dha të drejtë sa ishte gjallë, as partisë që ai drejton.
Në fund, duke perifrazuar Dhimitër Paskon nga njëri prej shkrimeve më brilante, “Midis të gjallëve dhe të vdekurve”, gjejmë dhe përgjigjen për Kryeministri Edi Rama:
Po të jetë se vini në Teatrin Kombëtar – për do – një punë më të kthjelltë se kontrabanda…
Mesazhi i Ramës:
Mihallaq Luarasi, regjizori i famshëm i Teatrit Kombëtar, u kthye në shënjestrën e pamëshirshme të diktaturës komuniste, gjatë gjuetisë së egër të shtrigave që Enver Hoxha shpalli në vitet ‘70, kundër artit e kulturës së degjeneruar perëndimore. Ai u linçua publikisht nga vetë diktatori komunist dhe u cfilit burgjeve, duke hyrë në librat e gazetat e propagandës enveriste, si një dele e zezë e regjimit totalitar. Ai sot nuk jeton më, por e ka lënë pak vite më parë amanetin e tij për Teatrin Kombëtar.
MIHALLAQ LUARASI:
Ky teatër që kemi sot është i pandreqshëm. Është turp që Teatri Kombëtar i Shqipërisë ka ngelur në atë ndërtesë të ndërtuar që në kohën e Italisë. Qysh në vitin 1966, drejtuesve të asaj kohe i është kërkuar një teatër i ri, që fatkeqësisht nuk u ndërtua kurrë. Duhet më shumë vëmendje për Teatrin Kombëtar, nuk duhet një rikonstruksion i tij, por ndërtimi i teatrit të ri.
Më 1966 në Teatrin Kombëtar, kur ishte gjallë dhe aktori i madh Naim Frashëri, rastësisht u takuam në oborr me Manush Myftiun, anëtar i byrosë politike atë kohë. Naimi i tha: “Nuk po mendon partia për një teatër të ri?”, ndërsa përgjigja e Manush Myftiut ishte: “Naim, nipat tanë të ndërtojnë një teatër të ri, ne nuk kemi mundësi, presim nga nipat tanë”. Pra ne jemi ata që sot duhet ta ndërtojmë një teatër të ri kombëtar.
