Çfarë po ndodh me kompanitë shqiptare të sigurimit në Kosovë? Pas “Insig” edhe “Eurosig” drejt falimentimit!

Muaj më parë Banka Qendrore e Kosovës ka marrë vendim që kompanisë së sigurimeve “Insig”  t’i revokohet Liçenca. Në vendimin që kishte marrë BQK kishte treguar se ky vendim ishte  marrë pasi kompania nuk ka përmbushur kërkesat ligjore.  Një fat të tillë duket se do ta ketë shumë shpejt edhe një kompani tjetër që vepron në Kosovë.

Ende pa u bërë dy muaj që kur kompania e Sigurimeve “Insig” ka mbetur pa licencë për të vepruar në Kosovë, një kompani tjetër po rrezikon që të ketë fat të ngjashëm

Drejt falimentimit është duke shkuar kompania “Eurosig”, e cila për momentin është nën administrim rigoroz të Bankës Qendrore të Kosovës, për shkak të gjendjes jo të mirë financiare. Eurosig është kompani me kapital shqiptar, që kishte në pronësi edhe INSIG në Kosovë.

Në Bankën Qendrore të Kosovës ka në treguar  se “Eurosig” është nën administrimin e BQK-së, por nuk kanë pranuara të japin shumë detaje .

Në BQK vetëm kanë thënë se bordi shumë shpejt do ta marr një vendim për këtë kompani .

“ Ka kohë që BQK është duke e monitoruar këtë kompani. Por, për vendimet e ardhshme të Bordit Ekzekutiv të BQK-së në raport me siguruesin “Eurosig” Sh.A. do të njoftoheni me kohë”.

Sipas BQK, një kompani e sigurimeve është në gjendje jo të mirë financiare atëherë kur ka vështirësi financiare në përmbushjen e kërkesave ligjore për sa i përket mjaftueshmërisë së kapitalit dhe aftësisë paguese.

Kompania Eurosig sipas të informatave që janë paraistur në ueb-faqe është  themeluar si shoqëri sigurimi e produkteve të Jo–Jetës në shtator të vitit 2004, nën emrin DUKAGJINI SH.A, në dhjetor të vitit 2005 shoqëria shet aksionet 100% dhe në mars të vitit 2006 hyn në treg me emrin EUROSIG SHA, tërësisht me kapital vendas dhe me aksionarë të rinj.

Në ueb-faqen e kompanisë po ashtu tregohet se pas dymbëdhjetë viteve aktivitet në industrinë e sigurimeve, Eurosig renditet në vendin e dytë në tregun e sigurimeve në Shqipëri, me 15,63% të tregut të Jo-Jetës.

Eurosig në vitin 2014 është shtrirë edhe në Kosovë duke e blerë kompaninë  e sigurimeve “Dardania” dhe privatizimi më 2016 i INSIG (VKM e datës 23 mars 2016), ka sjellë zgjerimin e veprimtarisë së Eurosig në fushën e sigurimeve dhe në Kosovë e Maqedoni.

“Tashmë Grupi Eurosig përbëhet nga: EUROSIG Shqipëri për veprimtarinë e Jo-Jetës, EUROSIG Kosovë për veprimtarinë e Jo-Jetës, EUROSIG Maqedoni për veprimtarinë e Jo-Jetës, INSIG Shqipëri për veprimtarinë e Jo-Jetës, INSIG Kosovë për veprimtarinë e Jo-Jetës dhe INSIG Shqipëri për veprimtarinë e sigurimit të Jetës. Aktualisht EUROSIG Kosovë renditet në vendin e parë në veprimtarinë e Jo-Jetës në Kosovë. Edhe EUROSIG Maqedoni është në rritje të shpejtë të peshës në tregun e veprimtarisë së Jo-Jetës në Maqedoni. Këto zhvillime kanë patur një impakt të rëndësishëm pozitiv për Eurosig, në rritjen dhe konsolidimin e veprimit të saj në tregun e sigurimeve në Shqipëri dhe rajon”, thuhet në informatat që ka dhënë kompania në ueb-faqen e vetë.

Muajin e kaluar kemi raportuar rreth falimentimit të kompanisë “Insig”, duke sjell detaje rreth gjendjes në të cilën ka kaluar kjo kompani.

Në Bankën Qendrore të Kosovës patën treguar  se bazuar në raportet financiare të dorëzuara në BQK për periudhën 31 dhjetor 2018, kompania Insig ka qenë josolvente pasi që vlera e gjithsej detyrimeve, në masë të konsiderueshme ka qenë më e lartë se vlera e aseteve të saj.

“..si e tillë ka paraqitur paaftësi për përmbushjen e detyrimeve të saj, pjesa më e madhe e të cilave ka qenë ndaj policëmbajtësve dhe kreditorëve të tjerë”.

Në Bankën Qendrore të Kosovës kanë treguar se aksionari i Kompanisë “Insig”  nuk i është përgjigjur kërkesave të BQK-së për rritjen e kapitalit dhe arritjes në pajtueshmëri me kërkesat ligjore në fuqi.

Kompania e sigurimeve “ INSIG “ është themeluar në vitin 1991 me pronësi 100 % të Parlamentit Shqiptar për të ushtruar veprimtarinë e sigurimeve dhe ri sigurimeve në Republikën e Shqipërisë, përfaqësuar nga Ministria e Ekonomisë dhe Financave.

Më 1 Mars 2000 Kompania e sigurimeve “ INSIG “ është licencuar për të operuar në tregun Kosovar të sigurimeve si degë e kompanisë amë “ INSIG “ Shqipëri.

Në vitin 2015 “ INSIG “ sh.a ndryshon pronësinë e aksioneve, të cilat zotërohen në masën 100 % nga Ministria e Financave. Gjatë vitit 2016, Kompania e Sigurimeve “ INSIG “ sh.a me seli ne Tiranë ka shitur 100 % të aksioneve të zotëruara nga shteti, duke ndryshuar pronësinë e aksioneve të cilat tani zotërohen ne masën 100 % nga Shoqëria e Sigurimeve “ EUROSIG “ sh.a me seli në Tiranë, me pronar Kadri Morina./Monitor/