Cirku në Parlamentin e Kosovës vazhdon, Kurti letër Abdixhikut
Dështon edhe përpjekja e 11-të e konstituimit të Parlamentit të Kosovës.
Në seancën me 111 deputetë të pranishëm, 1 ishte kundër, nuk kishte abstenime, dhe vetëm 56 deputetë votuan për votim formimin e Komisionin për votim të fshehtë të kryetarit të Parlamentit të Kosovës.
54 deputetë përveç se kundërshtojnë çdo gjë që vjen nga Albin Kurti vazhdojnë të kundërshtojnë edhe vendimin e Gjykatës Kushtetuese e cila i obligon të marrin pjesë në votim pavarësisht se si deklarohen.
Ky lloj Parlamenti që nuk ndryshon asgjë nga një cirk, i tillë ishte edhe kur mbajti një minutë heshtje në nderim të 5 majit, Ditës së Dëshmorëve.
Pa pikë turpi, pasi për 11 seanca përdhosën vlerat e shtetit të Kosovës, sot deklarohen se nderojnë ata që dhanë jetën për lirinë e këtij shteti,
Në fund, pasi votimi për formimin e Komisionit nuk pati kuorum, kryesues ii seancës konstituive, Avni Dehari, dekalroi se seanca vazhdon pas 48 orësh.
Me përfundimin e seancës dhe pas akuzave të ndërsjellta mbi fajtorin e kësaj situate, u publikua dhe letra që Kryetari i Lëvizjes Vetëvendosje, Albin Kurti, i dërgoi Kryetarit të Lidhjes Demokratike të Kosovës, Lumir Abdixhiku.
Kurti: Jemi të interesuar për koalicion me LDK-në
Kryetari i Lëvizjes Vetëvendosje dhe Kryeministri në detyrë, Albin Kurti, i ka kërkuar përmes një letre, Kryetarit të LDK-së, Lumir Abdixhiku, një marrëveshje politike për një koalicioni qeverisës.
“Po ju drejtohem me këtë letër meqë nuk u takuam ende. Deputetë të LDK-së së fundmi kanë deklaruar publikisht se për të ecur përpara në legjislaturën e nëntë, fillimisht me konstituimin e Kuvendit, nevojitet marrëveshje politike. Si kryetar i LVV-së dhe kryeministër në detyrë i Republikës së Kosovës, jam i interesuar dhe i vullnetshëm për marrëveshje politike me LDK-në,” thekson Kurti në letrën e tij duke arsyetuar:
“Në sigurisht që kemi dallime në bindje politike e në politikat qeverisëse, por koalicionet bëhen pikërisht ndërmjet atyre që kanë dallime, duke vendosur të drejtat dhe nevojat e shtetit dhe të qytetarëve si prioritet.”
Albin Kurti në letër thotë se LDK njihet si parti e cila nuk ka hezituar për koalicione qeverisëse ndër vite, 2001–2004 me PDK dhe AAK, në 2004–2007 me AAK, në 2008–2010 me PDK, në 2014–2017 sërish me PDK, ndërkaq në 2020 me LVV.
“Mosmarrëveshjet e diferencat që mund të ketë LDK me LVV sot nuk janë më të mëdha sesa që LDK i kishte para koalicioneve të mëhershme kur i bëri ato. Plus, në vitin 2020 ne bashkë kemi qenë kolegë në Kurti 1, kur unë nuk kam pasur probleme me juve, por me disa të tjerë që nuk kanë më pozita të larta e as ndikim të madh në LDK si asokohe,” tha Krytari i LVV, Albin Kurti, në letrën drejtuar Kryetarit të LDK, Lumir Abdixhiku me shpresën se do të takohen si politikan të pjekur që kanë të ardhmen e shtetit prioritet.
