Çmenduritë e Putinit, Rusia furnizuesi më i madh i armëve i Ukrainës
Armatimi i mbledhur nga betejat e fituara ditëve të fundit, së bashku me ato gjatë tërheqjes ruse nga Kievi dhe pjesëve tjera në veri të Ukrainës gjatë muajit prill, e kanë shndërruar Moskën në furnizuesin më të madh të armëve të rënda për Ukrainën, duke e lënë shumë mbrapa SHBA dhe aleatët tjerë, ndonëse ushtarakët ukrainas thonë se armët perëndimore janë më të përparuara dhe precize.
Tanket e braktisura ruse, armët artilerike dhe mjetet e blinduara, prej të cilave me shpejtësi u fshinë simbolet taktike Z dhe u zëvendësuan me kryqin ukrainas, filluan të përdoren kundër ish-pronarëve deri sa Ushtria e Ukrainës po përparon në lindje të vendit.
Depërtimi i shpejtë ukrainas në rajonin e Harkivit para një muaji, përfundoi me kalimin e qindra mjeteve të blinduara ruse në duart e Kievit, theksojnë zyrtarët ushtarak, sepse ushtria ruse e ka lënë armatimin e rëndë dhe depotë përplotë me armatim në tërheqjen e ç’organizuar, raporton The Wall Street Journal.
Një batalion ukrainas arriti të marrë 10 tanke moderne T-80 dhe pesë topa 2S5 Giacint të kalibrit 152 mm, pasi u fut në muajin shtator në qytetin Izjum, tha Zv/Shefi i Shtabit, Ruslan Andrijko.
“Kemi aq shumë trofe sa nuk dimë se çfarë të bëjmë me to. Kemi filluar si një batalion këmbësorie, dhe tani po bëhemi batalion i mekanizuar,” tha Andrijko.
Shefi i Shtabit të batalionit të artilerisë në frontin e Harkivit tha se njësiti i tij tani po shfrytëzon edhe katër topat rus 2S19 Msta të kalibrit 152 mm që sapo ka kapur, si dhe topat e prodhimiti amerikan, dhe ka armatim të panumërt të kalibrit sovjetik.
Ukraina thuhet se ka kapur 460 tanke ruse, 92 topa, 448 mjete luftarake të këmbësorisë, 195 mjete të blinduara luftarake dhe 44 sisteme raketahedhësish, bazuar nga ato që janë publikuar në rrjetet sociale dhe nga ana e kompanisë konsulore sekrete, Oryx. Numri i vërtetë me siguri se është shumë më i madh meqë dihet se nuk filmohen të gjitha pajisjet e kapura ushtarake.
Ndryshe, nuk duhet harruar se para luftës, Ukraina ishte një prodhues i madh dhe eksportues i madh i tankeve.
