Çmimet e larta, sot në Kroaci bojkotohen dyqanet, qendrat tregtare dhe pikat e karburantit

Filloi si një iniciativë në rrjetet sociale por sot qytetarët e Kroacisë iu përgjigjën pozitivisht thirrjes dhe dyqanet, qendrat tregtare dhe pikat e karburantit janë bosh, për shkak të rritjes së vazhdueshme të çmimeve.

Gjithçka filloi me grupin në Facebook “Alo, inspektor”, prapa së cilës qëndron Qendra Euroiane e Konsumatorëve, ECIP, ndërkohë u mbështetë nga shoqatat kroate për mbrojtjen e konsumatorëve, sindikatat, partitë politike e madje edhe ministri i Ekonomisë, dhe sot kemi këto pamje aty ku nuk respektohet konsumatori:

Ndryshe, kjo iniciativë filloi me mesazhe që filluan të shpërndahen në rrjetet sociale.

“24 Janar në Kroaci bojkot kundër çmimeve të larta të ushqimeve.

Ftesë njerëzve që në këtë ditë asgjë të mos blejnë, asgjë. Përgatituni për këtë ditë sikur të ishte ditë e dielë,” thuhet ndër të tjera në këto mesazhe.

Dhe, sot, suksesi ishte i plotë, gjithçka ishte bosh; Madje, qytetarët shprehën vullnetin që një bojkotim të tillë ta bëjnë edhe për 30 ditë.

Blloku i pensionistëve ishte dhe më konkret, paralajmëroj një bojkotim nga 1 Marsi nëse nuk ulen çmimet. 

“Nëse kjo nuk ndodhë, paralajmërojmë bllokim të një qendre tregtare për 30 ditë. Një aksion i tillë do të detyroj tregtarët të reagojnë sepse askush nuk dëshiron të bllokohet për një muaj,” tha Kryetari i Bllokut të pensionistëve Milivoj Shpika.