Çmimet në Shqipëri, rritje me ritme të ngjashme me BE
Çmimet në Shqipëri u rritën me ritme të ngjashme me mesataren e BE, sipasIndeksit të Harmonizuar të Çmimeve të Konsumit, IHÇK, të publikuar nga INSTAT, që mat ndryshimin e nivelit të çmimeve me pakicë të mallrave dhe shërbimeve nga pikëpamja e strukturës së shpenzimeve të cilat konsumatori (vendas dhe i huaj) synojnë për konsumin final në territorine Shqipërisë.
Ndryshimi vjetor i matur nga Indeksi i Harmonizuar i Çmimeve të Konsumit në muajin Shkurt 2021 është 1,3%, e njëjtë me mesataren e Bashkimit Europian. Rritja më e madhe e çmimeve prej 2,4% vërehet në grupin “Pije alkoolike dhe duhan”, pasuar nga grupet“ Ushqime dhe pije joalkoolike” me 2.3 %, “Shëndeti” 1,7 %, “Mobilim, pajisje shtëpie dhe mirëmbajtje” me 1,4 % “Transporti” me 1,1 %, “Komunikimi” dhe “Hotele, kafene dhe restorante” me 0,7% secili, “Mallra dhe shërbime të ndryshme” me 0,6 %,“Argëtim dhe kulturë” me 0,3 %.
Nga ana tjetër çmimet e grupit “Veshje dhe këpucë” u ulën me 0,8%, pasuar nga grupi “Qira, ujë, lëndë djegëse dhe energji” me 0,3%. Në muajin Shkurt 2021, ndryshimi mujor i matur nga Indeksi i Harmonizuar i Çmimeve të Konsumit është 1,4%.
Ky ndryshim është ndikuar kryesisht nga rritja e çmimeve të grupit “Ushqime dhe pije joalkoolike” me3,5%, pasuar nga grupet “Pije alkoolike dhe duhan” me 0,5%,“Transporti” me 0,4 %, “Hotele, kafene dhe restorante” me 0,3 %, etj. Grupi “Argëtim dhe kulturë” shënoi një ulje me 0,5 %, pasuar nga grupi “Veshje dhe këpucë” me 0,4 % ulje, etj.
Në shkurt, Shqipëria ishte e dhjeta për rritjen e çmimeve në krahasim me vendet e Bashkimit Europian.
Publikimi i Indeksit të Harmonizuar të Çmimeve të Konsumit bëhet nga ana INSTAT që nga janari 2017 duke dhënë kështu një panoramë të qartë të lëvizjes së çmimeve me pakicë në vendet Evropiane dhe duke krahasuar përqindjen e inflacionit ndërmjet vendeve, në ndryshim nga Indeksi i Çmimeve të Konsumit që mat vetëm inflacionin zyrtar në Shqipëri.
Inflacioni i Eurozonës matet mbi bazën e treguesit të IHÇK-së. Termi “i harmonizuar” nënvizon faktin që të gjitha vendet e BE-së zbatojnë të njëjtën metodologji në matjen e treguesit përkatës.
Ndryshimet e kontributit nga një tregues në tjetrin lidhen me faktin se kompozimi i peshave të mallrave brenda grupit “Ushqime dhe pije joalkoolike” është i ndryshëm nga një tregues në tjetrin.
Kështu, brenda këtij grupi, nëngrupi “Fruta – Perime”, ka një peshë më të madhe te shporta e IHÇK-së (12.84% e shportës totale) sesa tek ajo e IÇK-së (8.44% e totalit)./Monitor/
