Çmimi i Barcelonës dhe çmimi që paguajmë për Veliajn…

Një shi jo më shumë se 30 minuta përmbyti rrugët kryesore të Tiranës, ndërsa me dhjetra pamje filmike dhe fotografi u përhapën në rrjet, duke u bërë virale. Si për ironi përmbytjes nuk i shpëtoi as sheshi “Skenderbej”, ai për të cilin Erjon Veliaj, si Kryebashkiak i Tiranës mburret prej kohësh, madje rrëmbeu edhe një çmim së fundmi nga Barcelona.

Por një ditë pas çmimit që Veliaj e shiti si një suvenir të rrallë për opinionin, qytetarët e Tiranës, paguan një tjetër çmim, atë që për 30 minuta natyra i rezervoi fasadës që Lali Eri ka ngritur në kryeqytet.

Kështjella e rërës së Kryebashkiakut u rrëzua dhe fatmirësisht reshjet e shiut nuk zgjatën edhe 30 minuta të tjera, pasi Tirana mund të përballej me një situatë që njeriu i “kullave” të Tiranës nuk do e kishte parë as në ëndërr.

Nesër Lali mund të shfaqet sërisht në ekranet e TV, para mikrofonëve të gazetarëve që kishte me vete në Barcelonë, dhe të na tregojë përpjekjet e mëdha që u bënë për të kthyer situatën në normalitet, për aksionin e pastrimit të rrugëve, apo për zëvendësimin e pemëve që u thyhen.

Por, situata e sotme e nxorri zbuluar, i pastroi makiazhin që kishte vendosur dhe shumëkush që e do këtë qytet, qoftë se ka dhënë, apo kërkon t´i japë, por jo për t´i marrë gjithçka, kuptoi fasadën që ka ngritur me aq mjeshtëri Kryebashkiaku që dhuron show.

Ndoshta Erjoni ka menduar se menaxhimi i një qyteti, është fasadë, grabitje, kulla, apo blegërima në salla Kuvendi apo Këshilli Bashkiak.

Ndoshta mendon se të menaxhosh një kryeqendër është e njëllojtë sikur të lyesh flokët me xhel dhe të parfumosesh, të flasësh si lac me vartësit, si i fortë me të dobtit, apo si dhjaks me të fortët.

Në fakt menaxhimin 3 vjeçar të kryelacit të Tiranës e panë dhe e përjetuan banorët e kryeqytetit, madje edhe ata që kanë votuar dhe besuar symbyllurazi tek “aftësitë” e tij, që qan, qesh, kërcënon, abuzon dhe vret pak nga pak këtë qytet, duke e shitur si Rilindje.

99-shi i dikurshëm që shfaqej në rrugët e Tiranës si trendy, duket se sot është kthyer në një përbindësh, që ushqen dhe mban rreth e rrotull të tjerë 99-sha dhe rezultati është ai që u pa sot: një Tiranë e përmbytur, me puseta që shpërthenin, me njerëz që duhej të bënin 3 hapëshin për të kaluar nga një trotuar në tjetrin dhe me një aromë fekalesh, që kundërmonte kudo në rrugët e metropolit të Lalit.

Sot ai u fsheh, jo se ka turp dhe cipë, por sepse po përgatit show e rradhës që do të japë nesër…