Çmimi i naftës fillon të rritet në disa pika të Tiranës, arrin 179 lekë për litër

Në disa pika të shitjes me pakicë në Tiranë ka nisur rritja e çmimit të naftës me 4 lekë për litër. Shtrenjtimi i çmimit me pakicë vjen pas ndryshimit të naftës në bursat e huaja, pas sulmeve në vendet e Lindjes së Mesme.

Sipas vëzhgimit të “Monitor”, rritja e çmimit të naftës ka nisur të reflektohet prej ditës së djeshme në disa nga pikat e tregtimit të karburanteve me pakicë, ndërsa çmimet në autostradë kanë mbetur të pandryshuara.

Në pikën e shitjes me pakicë të karburanteve “Elda” në zonën e “Xhamllikut” çmimi i naftës ka arritur 179 lekë për litër nga 175 lekë për litër që tregtohej më parë. Çmimi është rritur 4 lekë. Ndërsa çmimi për benzinën ka mbetur i pandryshuar prej 179 lekë për litër.

Edhe në një pikë tjetër karburanti në të kompanisë “Elda” në zonën e Bërrylit, çmimi i naftës ka arritur 179 lekë. Punonjësit e pikës së karburantit pohuan se rritja e çmimit nisi prej ditës së djeshme.

Ndërsa nuk rezultojnë rritje të çmimit në pikat e kompanisë “Kastrati” nafta vijon të tregtohet me 175 lekë për litër. Në pikat e kompanisë “Shell” po ashtu çmimi i naftës ka mbetur i pandryshuar në vlerat e 178 lekë për litër.

Nga Shoqata e Hidrokarbureve u paralajmërua që çmimet e rritjes së naftës në bursa do të reflektohen brenda pak ditësh në tregun vendas me 10 deri 20 lekë më tepër.

Në bursat e huaja ditën e sotme çmimet e naftës janë 83 USD për fuçi nga 65 USD për fuçi që ishin para nisjes së luftës në Iran.

Autoriteti i Konkurrencës fillon monitorimin e tregut me pakicë të karburanteve

Autoriteti i Konkurrencës njofton se, mbështetur në ligjin nr. 9121/2003, ka nisur monitorimin e tregut të karburanteve me shumicë dhe me pakicë, me fokus të veçantë tek çmimet e benzinës dhe naftës në pikat e shitjes me pakicë.

“Bëjmë me dije se, të gjitha ndërmarrjet që ushtrojnë veprimtarinë e tregtimit të karburanteve janë aktualisht nën monitorim nga Autoriteti i Konkurrencës.

Në rast se vërehen luhatje të çmimeve që tejkalojnë masën e ndryshimeve të çmimeve në bursat ndërkombëtare, Autoriteti, në zbatim të ligjit nr. 9121/2003, do të ndërmarrë masat e nevojshme sipas kompetencave të tij”, thuhet në njoftim.

Në praktikë, çmimet e karburanteve në tregjet ndërkombëtare përditësohen në mënyrë të vazhdueshme, duke reflektuar faktorë si oferta, kërkesa, kostot e përpunimit, si dhe zhvillime të tjera ekonomike apo gjeopolitike. Si rrjedhojë, sipas standardeve të konkurrencës së ndershme, pritet që luhatjet e çmimeve në tregun vendas të ndjekin të njëjtin drejtim dhe të jenë proporcionale me masën e ndryshimeve që regjistrohen në bursë.

Çdo devijim i pajustifikuar, qoftë edhe rritje e pakoordinuar por më e shpejtë apo më e theksuar se ecuria e çmimeve ndërkombëtare, përbën tregues të mundshëm të sjelljeve jo konkurruese në treg.

Autoriteti i Konkurrencës thekson se nuk do të tolerojë luhatje të pajustifikuara të çmimeve, praktika që bien ndesh me logjikën e tregut ndërkombëtar, si dhe asnjë formë të mundshme koordinimi të çmimeve, abuzimi me pozitën dominuese apo praktikash të bashkërenduara mes operatorëve të tregut.

Me këtë proces monitorimi, Autoriteti synon të garantojë transparencë, funksionim të rregullt të tregut dhe mbrojtjen e konsumatorëve nga çmime të padrejta apo nga sjellje që cenojnë konkurrencën.

“Sqarojmë se, në përputhje me misionin dhe kompetencat e përcaktuara për Autoritetin e Konkurrencës, të gjitha monitorimet dhe procedurat e mundshme hetimore kryhen vetëm në zbatim të ligjit nr. 9121/2003 “Për mbrojtjen e konkurrencës”, pa u ndërthurur me atributet që i përkasin institucioneve të tjera ligjzbatuese në vend”, përfundon njoftimi.

Gjatë ditës së sotme disa pika karburanti në kryeqytet njoftuan rritjen e çmimeve të naftës e benzinës me 4 lekë për litër. Operatorët e tregut kanë paralajmëruar për një shtrenjtim deri në 20 lekë për litër./Monitor/