COVID-19 i merr jetën dy mjekëve shqiptarë

Mëngjesi ishte i hidhur për mjekësinë shqiptare. Sot COVID-19 mori jetën dy mjekëve të njohur në Kosovë, kirurgut nga Gjakova, Ali Tolaj, dhe reumatologut në Prishtinë, Sylejman Rexhepi.

Pas një beteje me koronavirusin, mëngjesin e sotëm ka ndërruar jetë kirurgu nga Gjakova, Ali Tolaj.

Dr.Tolaj që nga fillimi i pandemisë ishte në krye të detyrës duke ju shërbyer pacientëve deri në ditën kur edhe vetë rezultoi pozitiv me COVID-19.

Ali Tolaj ka punuar si kirurg në Spitalin e Përgjithshëm të Gjakovës që nga viti 1988.

Ndërkohë COVID-19 i mori jetën mëngjesin e sotëm edhe reumatologut të njohur shqiptar, Prof. Sylejman Rexhepi. Lajmin e ka konfirmuar Drejtori i Klinikës së Reumatologjisë Dr. Avni Kryeziu. Ai ka thënë se sot në mëngjes është njoftuar zyrtarisht nga kolegët e tij të cilët kanë qenë kujdestar në Mjekësinë Sportive, ku i ndjeri po trajtohej për rreth 2 javë në gjendje të rëndë.

Duke shprehur dhimbjen dhe solidaritetin e thellë me familjet e tyre, Ministri i Shëndetësisë i Kosovës, Armend Zemaj, i bëri thirrje popullatës që të rrisin kujdesin ndaj vetes dhe të tjerëve, sepse Covid-19, po dëshmon ditë e më shumë se është një kërcënim i madh për jetën e njerëzve ndërsa përfundoi:

I përjetshëm kujtimi për profesorin Rexhepi dhe kirurgun Tolaj!