COVID-19, KE: Qytetarët e vaksinuar të udhëtojnë drejt BE!
Në prag të sezonit të ri turistik, Komisioni Europian sot ka propozuar që qytetarët e vaksinuar kundër COVID-19 të lejohen të udhëtojnë pa pengesa në Bashkimin Europian.
“Koha për të ringjallur industrinë e turizmit dhe miqësitë ndërkufitare në mënyrë të sigurt. Ne propozojmë të mirëpresim përsëri vizitorë të vaksinuar dhe ata nga vendet me një gjendje të mirë shëndetësore. Por nëse shfaqen variante, ne duhet të veprojmë shpejt: ne propozojmë një mekanizëm frenimi emergjent të BE,” bëri të ditur Presidentja e Komisionit Europian, Ursula von der Leyen
Time to revive ?? tourism industry & for cross-border friendships to rekindle – safely.
— Ursula von der Leyen (@vonderleyen) May 3, 2021
We propose to welcome again vaccinated visitors & those from countries with a good health situation.
But if variants emerge we have to act fast: we propose an EU emergency brake mechanism.
Komisioni po ashtu propozoi rritjen e pragut të shkallës së infektimeve të reja që aktualisht përdoret për të përcaktuar se nga cilat vende lejohen të gjitha udhëtimet.
“Udhëtimet jo të domosdoshme, pavarësisht nga statusi individual i vaksinimit, aktlualisht lejohen vetëm nga shtatë shtete me një situatë të mirë epidemiologjike.”
Aktualisht, nëse një vend ka 25 të infektuar për 100 mijë banorë në një hark kohor prej 14 ditësh, udhëtarët nga ai vend mund të vizitojnë BE-në. Propozimi kërkon rritjen e këtij pragu në 100 të infektuar për 100 mijë banorë.
“Komisioni Europian propozon lejimin e hyrjes në Bashkimin Evropian për arsye jo-të-domosdoshme, jo vetëm për individët që vijnë nga shtetet me situatë të mirë epidemiologjike, por gjithashtu për njerëzit që kanë marrë dozën e fundit të vaksinës së autorizuar nga BE-ja”, thuhet në njoftimin e Komisionit Evropian.
Ky Propozimi i KE për zbutjen e kufizimeve pritet të diskutohet këtë javë me Ambasadorët e vendeve të Bashkimit Evropian dhe mendohet të hyjë në fuqi deri në muajin qershor.
Ndryshe, vaksinat kundër koronavirusit të autorizuara nga Agjencia Evropiane e Barnave, EMA janë: Pfizer, Moderna, AstraZeneca dhe Johnson & Johnson. Aktualisht, nuk ka vaksina nga Rusia apo Kina që janë miratuar nga EMA ndërkohë të dhënat për vaksinën ruse Sputnik V po shqyrtohen.
