“Çuni i Vuçiçit për operacione speciale” kthehet në Serbi: Çfarë do të bëjë Aca Serbi me Marko Gjuriçin!

Marko Gjuriç, aktualisht Ambasador i Serbisë në SHBA ndërsa për opinionin shqiptar i njohur si zyrtari i vetëm serb i cili u prangos dhe u tërhoq zvarrë nga Policia e Kosovës, mund të bëhet ministër i Jashtëm, por mbeten të hapura edhe opsione të tjera pas ardhjes së Gjuriçit në Serbi.

Duke komentuar paralajmërimin e Presidentit të Serbisë, Aleksandar Vuçiç, përmes rrjetit social Instagram, pas shëtitjes që bëri në New York me Marko Gjuriçin, me përfundimin e seancës së Këshillit të Sigurimit të OKB, e përditshmja serbe “Danas” sjellë dhe mendimin e ekspertëve serbë të cilët janë në një mendje, se pavarësisht postit që do marrë, qoftë ai edhe i Kryeministrit, pushtetin dhe vendimet do ti marrë Vuciç.

“Dikur kur në Pomoravle shfaqej Bixha me Milosheviçin, njerëzit pyesnin se kush është ai pranë Dobrivoje Budimiroviçit. Kështu, shpresoj, një ditë njerëzit do pyesin kush ishte ai pranë Marko Gjuriçit. E Marko Gjuriç, po kthehet në Serbi dhe besoj se do ta kryej një detyrë shumë të rëndësishëm në vendin tonë,” tha Vuçiç përmes rrjetit social Instagram duke krahasuar si pa dashje Gjuriçin me një fshatar injorant i cili u bë i njohur në Serbi pasi në parlament i këndoi me zë kriminelit serb, Slobodan Milosheviç: “Slobodan, ti je komunist, të dua si Jesu Krishtin”.

Ky lajm i dhënë nga Presidenti i Serbisë përmes rrjeteve sociale ka hapur dhe debatin e postit të Gjuriçit pasi vetë Vuçiçi ka paralajmëruar se qeveria e re do të formohet deri në fund të muajit mars, edhe pse emri i tij është përfolur edhe për kreun e shërbimit sekret serb dhe kreut të partisë SNS pas ikjes së Vuçiçit.

Oferta mediatike e emrave për kabinetin e ri qeveritar pas zgjedhjeve nuk është ndonjë risi, mendon studiuesi nga “Demostat”, Milomir Mandiç, ndërsa e shikon si lëvizje logjike emërimin e tij si ministër i Jashtëm.

“Pse në këtë moment Marko Gjuriç mund të interpretohet në disa mënyra. Edhe pas zgjedhjeve të kaluara u fol për kthimin e tij, e tani këtë e paralajmëron vetë Vuçiç. Cili post mund të jetë, në pushtetin ekzekutiv apo legjislativ, mediat do spekulojnë dhe kjo do jetë edhe temë e mediave proqeveritare,” thotë për “Danas” Mandiç ndërsa pushteti me imponimin e kësaj teme në këtë moment krize i çon mesazh ndërkombëtarëve.

“Marko Gjuriç amabasador i Serbisë në Washington për të cilin kushtimisht mund të thuhet se është kuadër i SNS i cili nuk është me orientim antiperëndimor do të marrë një post të rëndësishëm në qeverinë e re. Megjithatë, në thelb bëhet fjalë për njeriun e dëshmuar luajal të partisë. Cilin post do ta marrë vetëm mund të spekulojmë por logjikisht nëse vjen nga diplomacia, të jetë ministria e Punëve të Jashtme, e ndoshta edhe diçka më shumë,” thotë Mandiç i bindur sërish se pavarësisht postit që marrin, Marko Gjuriç, Ana Brnabiç, Sinisha Mali e Milosh Vuçeviç, e gjithë fuqia ngelet në duart e Aleksandar Vuçiçit.      

Edhe analisti politik Dragomir Angjelkoviç është dakord me Mandiçin rreth postit të shefit të diplomacisë, por shton se mbeten të hapura të gjitha opsionet në një vend ku njeri vendos për gjithçka.

“Ky post nuk do të ketë ndonjë rëndësi për opinionin serb sepse Gjuriç është jopopullor. Më parë do ti jap një post që do ti shërbej Vuçcict për komunikimin me qendra të fuqive të mëdha, para së gjithash Amerikës dhe Izraelit, ku ai ka disa lidhje. Kështu që nuk do të përjashtoj mundësinë që të vijë në postin e ministrit të Punëve të Jashtme. Por, edhe çdo opsion tjetër, nga shefi  i shërbimit sekret BIA e tutje, është i hapur,” thotë Angjelkoviç ndërsa sqaron nëse Vuçiç është i pakënaqur me Gjuriçin ose është ai që i duhet.

“E para, Vuçiç nuk dëshiron që njerëzit të qëndrojnë gjatë në një post që të mos profilizohen. Sepse nëse dikush qëndron në një punë, siç është Gjuriç në Amerikë, ai mund të krijoj kontaktet e  veta të pavarura nga Vuçiçi, e ti bie në mend të jetë edhe më i pavarur. Ai dëshiron që ti lëviz njerëzit, siç bënte dikur Stalini.

E dyta, Gjuriçit i ka skaduar afati në Amerikë. Atë që kishte, ai bëri. Ai nuk është diplomat karriere, por vetëm çun për operacione speciale të Vuçiçit. Në atë kohë i duhej një njeri i tillë. Sot nuk i duhet më. Aq më shumë që Gjuriç ishte vendosur të luaj në administratën Trump. Tani Vuçiç vlerëson se ai i duhet në një tjetër post,” përfundon Angjelkoviç.

I të njëjtit mendim është dhe Ish-diplomati dhe Zv/Presidenti i Qendrës “Serbia”, Dushko Lopandiç, i cili mendon se Vuçiç mund ti shërbej në kontakte me lobistët dhe posti i ministrit të Punëve të Jashtme do të ishte më i logjikshmi.

“Gjuriç u dëshmua si bashkëpunëtor besnik i Aleksandar Vuçiçit, që është kushti numër një për përparim në partinë SNS, dhe bazuar në shumë karakteristika duke përfshirë këtu dhe arsimimin, Gjuriç është shumë lartë nga mesatarja e atyre që e rrethojnë Vuçiçin.

Përveç kësaj, qëndrimi në Washington i ka mundësuar Gjuriçit që të krijoj kontakte të caktuara dhe të njoh grupe të ndryshme lobistësh tek të cilët Vuçiç llogaritë që nga koha e firmosjes fatkeqe të Marrëveshjes së Washingtonit ose edhe më parë (mbështetja financiare për Klintonët),” kujton Lopandiç.

On the first day at work at the Embassy of Serbia to the United States, enthusiasm and adrenalin running high! Serbia and the US will work closer than ever for a better future for all! ???? pic.twitter.com/7488FqEjLs

— Марко Ђурић (@markodjuric) December 21, 2020

Ndryshe, nga mesi i shtatorit të vitit 2020, mediat publikuan lajmin se Gjuriç do të jetë ambasador i Serbisë në Washington. Në muajin nëntor mori dekretim, dhe në dhjetorin e vitit 2020 u bë zyrtarisht ambasador i Serbisë në SHBA, dhe ambasador jorezident edhe në nëntë shtete tjera.