Daçiç në KS OKB, Ambasadori gjerman: Copy-past i fjalimeve të mëparshme!

Ambasadori i Gjermanisë në OKB,  Christoph Heusgen, reagoi sot ashpër pas fjalimit të Ministrisē së Jashtëm të Serbisë, Ivica Daçiç, në Këshillin e Sigurimit të Kombeve të Bashkuara duke theksuar se përfaqësuesit serbë flasin shumë rreth krimeve të shqiptarëve dhe asnjëherë nuk dëgjohet rreth krimeve të kryera ndaj shqiptarëve në vitet 1998 dhe 1999, siç ishin pastrimi etnik dhe dëbimi masiv.

Ambasadori Heusgen i tha Daçiçit se i duket se fjalimi i tij është kopje e fjalimeve të mëhershme ndërsa kishte një mesazh për mburrjen serbe me suksesin e fushatës për tërheqjen e njohjeve të Kosovës:

“Jam i befasuar me këtë politikë të përpjekjes së tërheqjes së njohjeve. Miqtë tanë serbë po i qëllojnë vetes në këmbë, pasi nëse duan që t’i bashkëngjiten BE’së, duhet të punojnë në pranimin dhe vetë pranojnë atë,” tha Ambasadori gjerman duke shtuar se fjalimi i Daçiçit i duket copy-paste i fjalimeve të mëparshme të tij.

Ambasadori i Gjermanisë në OKB,  Christoph Heusgen, kritikoi edhe ambasadorin rus si kryesues, i cili nuk kishte lejuar diplomaten kosovare të përfundoj adresimin dhe e kritikoi atë se nuk e lejoi po ashtu që në Këshillin e Sigurimit të fliste edhe Përfaqësuesi Special i Bashkimit Europian për dialogun Kosovë-Serbi, Miroslav Lajçak.