Daçiç: Për anëtarësim në BE nuk bëjmë tregti për afate dhe Kosovën
Për Serbinë është e rëndësishme që të mbahet numri i atyre shteteve që nuk e kanë pranuar Kosovën, ndërsa për faktin se janë pesë shtete anëtare që nuk e kanë pranuar, ai tha se mjafton edhe një shtet i vetëm sepse nuk ka konsensus. Kjo është arsyeja që Kosova në të gjitha dokumentet e BE shënohet në mënyrë asimetrike, tha Ministri i Punëve të Jashtme i Serbisë , Ivica Daçiç në edicionin e lajmeve të mëngjesit në televizionin publik serb, RTS duke saktësuar:
“Për anëtarësimin e Serbisë në Bashkimin Evropian ekzistojnë afate të përcaktuar dhe një vit kornizë, viti 2025. Por, me shtetin serb, tha ai, nuk ka tregti për ndonjë afat në lidhje me BE-në dhe nuk mund të flitet për çështje vitale siç është Kosova.”
Me këtë rast ai e pranoi se shtetet e BE që e kanë pranuar Kosovën, vështirë se do të ndryshojnë qëndrim lidhur me këtë çështje, sepse ishin pikërisht këto shtetet që e kanë mbështetur politikën e viteve ’90-të.
Shefi i diplomacisë serbe, Ivica Daçiç tha se e mirëkupton reagimin e ministrit të Mbrojtjes të Serbisë, Aleksandar Vulin por prioriteti i politikës së jashtme serbe ngelet anëtarësimi në BE.
“Ky mbetet prioritet, por jo me çdo çmim,” tha sot Daçiç për Televizionin publik të Serbisë, RTS duke komentuar deklaratën e ministrit Vulin se “nëse për BE, kyçe është vetëm Kosova, atëherë duhet të ndryshojmë politikën e jashtme” ndërsa shtoi se ai deklarata të ngjashme ka dhënë edhe në kohën kur kryeministër ishte Aleksandar Vuçiç.
