Dalja nga kriza/ Ambasadorja e SHBA në selinë e PD, Basha: Shqiptarëve do t’iu japim një rrugë shprese!

Kryetari i Partisë Demokratike, Lulzim Basha, pas një takimi të veçantë që zhvilloi me Ambasadoren e SHBA në Tiranë, Yuri Kim, në selinë e PD, tha se qëllimi i gjithë këtij aktiviteti politik sot dhe atyre që do të vijnë është për t’u dhënë shqiptarëve një rrugë shprese dhe dalje nga kriza.

Pas takimit Lulzim Basha u shfaq optimisti dhe paralajmëroi se dita nuk ka mbaruar dhe se do të ketë plot zhvillime dhe lajme:

”Dita e zhvillimeve politike sot dhe atyre që do të vijnë do të jetë plot me lajme, me prioritete, me zhvillime. Për një gjë ju siguroj, se gjithçka që po bëhet po bëhet për t’i shërbyer një qëllimi që shkon përtej Partisë Demokratike dhe opozitës, qëllimi për t’u dhënë shqiptarëve një rrugë shprese dhe dalje nga kriza. Kështu që në këtë kuptim ndjehem i inkurajuar nga takimet sot dhe do të vazhdoj t’ju mbaj të informuar.”

Ndryshe, takimi me Ambasadoren e SHBA në Tiranë, Yuri Kim, u zhvillua pas takimit që Kryetari i PD, Lulzim Basha, pati me Presidentin e PE, David Sassoli, dhe Delegacionit të Kongresit të Autoriteteve Lokale pranë Këshillit të Evropës.