Dalje nga regjimi i burgut “41 biss”, Gjykata e Lartë rrëzon kërkesën e Shullazit

Gjykata e Lartë rrëzon pretendimet e Emiliano Shullazit dhe të bashkëpandehurve për t’u liruar nga qelitë e regjimit të burgut “41biss”.

 Kolegji tre anëtarësh i Gjykatës së Lartë nuk ka pranuar kundërshtimet e bëra nga të pandehurit ndaj vendimit të Apelit të Posaçëm për lënien e tyre në regjimin e sigurisë së rreptë. Afati 1-vjeçar që Shullazi duhet të qëndrojë në “41 biss”, raporton BW, sipas vendimit të Ministres së Drejtësisë Etilda Gjonaj përfundon në gusht 2021. Nuk dihet nëse Gjonaj do të miratojë sërish një vendim të tillë.

Emiliano Shullazi dhe grupi po vuajnë një dënim me 55 vite burg në total dhënë nga Gjykata për Krimet e Rënda për akuzat e “gjobëvënies” dhe “grupit të strukturuar kriminal”.

Ndërkohë çështja penale po shqyrtohet në Apel, por nuk ka ende një vendim

Ndryshe, regjimit “41-biss” i janë nënshtruar 270 të dënuar ose që janë në proces gjykimi që dyshohet se mbajnë kontaktet me botën e krimit jashtë hekurave.

Këtyre personave të dënuar, u lejohet të kryejnë vetëm një takim në muaj me familjarët, me të cilët nuk u lejohet kontakti fizik, ndërsa çdo bisedë mes tyre është e regjistruar. Po ashtu, të burgosurit kanë mundësinë e një telefonate 10 minutëshe në muaj, edhe ajo e regjistruar. Çdo korrespondencë me jashtë kontrollohet. Të burgosurit i ndalohet çdo objekt personal në qeli, si stilolaps, blloqe apo lekë.