Darko Tasiç dënohet me 22 vjet burg për krime lufte në Kosovë

Gjykata Themelore në Prizren ka dënuar me 22 vite burg të akuzuarin për krime lufte, Darko Tasiç. Për pikën e parë të aktakuzës, Tasiç u dënua me 7 vite burgim, kurse për atë të dytën me 15 vite burgim.

Sipas aktakuzës, Tasiç akuzohet se fillimisht gjatë periudhës 15 – 26 mars 1999, ka marrë pjesë së bashku me forcat policore dhe para ushtarake serbe, për të plaçkitur dhe shkatërruar pasuritë e popullsisë civile, duke djegur shtëpi, duke marrë automjetet bujqësore dhe sendet tjera me vlerë të të fshatarëve në përgjithësi dhe familjes Hajdari në veçanti.

Aktakuza e PSRK-së e ngarkon të akuzuarin Tasiç edhe me përdhosjen e trupave të pajetë, duke i djegur kufomat së bashku me forcat tjera policore dhe paramilitare, dhe duke i hedhur kufomat në lumin Drin, në një vend jashtë fshatit Krushë e Vogël.

Pas këtij vendimi ka reaguar Organizata e Veteranëve të Luftës së UÇK-së, e cila dënimin e Tasiçit, duk epasur parasysh krimet e tij mizore, e konsideron shumë të vogël.

“Gjykata Themelore në Prizren ka shqiptuar një dënim shumë të vogël ndaj Darko Tasiçit i cili ka kryer krime mizore ndaj popullatës civile shqiptare së bashku me forcat policore dhe para ushtarake, ka plaçkitur e shkatërruar pasuritë e shqiptarëve gjatë luftës së fundit në Kosovë,” tha në reagimin e tij, Kryetari i Organizatës së Veteranëve të Luftës së UÇK-së, Hysni Gucati.

Ndryshe, Darko Tasiçit do t’i llogaritet edhe koha e kaluar në paraburgim nga data 22.11.2017 deri në plotfuqishmërinë e aktgjykimit.