Data e zgjedhjeve, Basha: Shqiptarët kërkojnë zgjedhje sot, jo nesër!
Shumica absolute e shqiptarëve kërkojnë zgjedhje sot, jo nesër. Ata duan zgjidhje sepse janë të lodhur nga propaganda, nga dështimet dhe mashtrimet,” tha Kryetari i PD, Lulzim Basha, pas takimit me Presidentin e Republikës ku u diskutua data e zgjedhjeve parlamentare 2021 duke shtuar se për Partinë Demokratike është e rëndësishme që procesi të jetë i lirë dhe i ndershëm.
“Qytetarët kanë nevojë urgjente për punë. Biznesi ka nevojë urgjente për mbështetje. Mjekët, infermierët kanë nevojë për rritje pagash, për kushte dinjitoze për t’u përballur me kolapsin e sistemit shëndetësor i cili është bërë edhe më i dukshëm prej pandemisë. Fermerët kanë nevojë për subvencione, kanë nevojë për treg shitje. Të rinjtë kanë nevojë për mundësi për arsimim dhe punësim që të qëndrojnë, dhe të jetojnë e të ndërtojnë jetën e tyre këtu në Shqipëri. Pensionistët kanë nevojë për rritje reale, jo elektorale të pensioneve. Pra, shumica absolute e shqiptarëve kërkojnë zgjedhje dhe zgjidhje sot, jo nesër,” tha Kryetari i Partisë Demokratike, Lulzim Basha duke e mbyllur me fjalët e Nënë Terezës:
“E djeshmja ka shkuar. E nesërmja nuk ka ardhur akoma. Prandaj le të fillojmë të punojmë menjëherë për të sotmen dhe për të nesërmen, duke filluar sot të punojmë për ndryshimin.”
Ndryshe, sot Presidenti i Republikës, Ilir Meta, ka zhvilluar konsultime me krerët e partive politike për datën e zgjedhjeve të ardhshme parlamentare 2021 ku partitë opozitare kanë propozuar datën 18 Prill ndërsa mazhoranca është shprehur e gatshme të shkojë në zgjedhje në çdo datë që do të përcaktojë Presidenti i Republikës, me përjashtim të 2 Majit e cila përkon me festën e Pashkëve Ortodokse .
