Data e zgjedhjeve, Presidenti dekreton datën e Belinda Ballukut – 11 Maj 2025

Pasi konsultoi çdo person që i kaloi në trotuarin e Presidencës, deri sa pjesë e këtyre konsultimeve u bë edhe Zotni Lafsha pa parti, dhe, kur durimi po skadonte në radhët e patronazhistëve socialistë sa ministrja Belinda Balluku e bëri publike datën pa u dekretuar, 11 Maj 2025, sot Presidenti i Edi Ramës dekretoi po këtë datë për mbajtjen e zgjedhjeve parlamentare në vitin 2025.

Ndryshe, në arsyetimin e kësaj date, Presidenti i Edi Ramës thekson se Partia Demokratike dhe një pjesë e konsiderueshme e partive parlamentare i paraqitën Presidentit të Republikës shqetësimin, se planifikimi i samitit të 6-të të Komitetit Politik Evropian për datat 8 dhe 9 maj të vitit 2025, dy ditë para datës së fundit të mundëshme për zhvillimin e zgjedhjeve, formon ndikim dhe avantazh të papranueshëm për qeverinë, si dhe cënon ndjeshëm parimin e barazisë së armëve që kërkon Kodi Zgjedhor për fushatën zgjedhore.

Por, pasi bëri të gjitha verifikimet e nevojshme me autoritetet kompetente të Shqipërisë, mori zyrtarisht sigurimet, se aktiviteti i mësipërm do të zhvillohet pas zgjedhjeve parlamentare!