Debati/ Dialogu me Serbinë, AAK dhe NISMA përplasen me Vetëvendosje
Seanca e Parlamentit të Kosovës ka devijuar nga debati mbi dialogun me Serbinë dhe është shndërruar në replika dhe kundër replika të ashpra të deputetëve.
Deputeti i AAK-së, Ahmet Isufi, ka kërkuar që të mos dilet nga tema, por të diskutohet propozimi për rezolutën e PSD-së për dialogun me Serbinë në Bruksel, duke thënë se në këtë seancë po prezantohen edhe pika nga partitë e tjera, andaj duhet bërë harmonizimi i pikave të kësaj rezolute.
Ndërsa, Teuta Haxhiu nga AAK ka pyetur LDK-në nëse e ka zgjedhur Hashim Thaçin për president. Ndaj kësaj deklarate ka reaguar deputetja Lirie Kajtazi nga LDK-ja, e cila pyetur AAK-në se çfarë ka bërë me mbi 200 mijë nënshkrimet e qytetarëve kundër demarkacionit me Malin e Zi.
Drita Millaku nga Vetëvendosje tha se platforma e presidentit Hashim Thaçit për dialogun ka dështuar dhe nuk ka pasur zgjidhje, dhe se krejt çfarë është dialoguar deri më tash duhet analizuar për dëmet që janë pësuar.
Për fondin pensional të grabitur nga Serbia, ajo tha se nuk është diskutuar asnjëherë në dialog, ndërkohë që nuk janë kthyer as dokumentet kadastrale dhe as artefaktet, dëmet e luftës, edhe pse ato ishin pjesë e platformës dialoguese.
“Mjaft me marrëveshje të fshehta, e të dëmshme, mjaft me tradhti prapa shpine, nuk ju duron më askush. Hashim Thaçi, Ramush Haradinaj dhe asistentët e tjerë të pazareve duhet të shkoni. Shtatë vite të padrejtësi iu shkaktuan Kosovës”, tha ajo.
Bilall Sherifi nga Nisma Socialdemokrate ka reaguar ndaj deklaratave të Millakut, duke thënë që të mos merret me shpifje, pasi që kryetari i kësaj partie Fatmir Limaj nuk i jep llogari Vetëvendosje, por vetëm votuesve të tij.
“Mos kërkoni armiq dhe kundërshtar aty ku nuk keni, por pasi bërë një pyetje, do të bëjë po ashtu një pyetje: A e besoni në atë që e thatë, apo vetëm e lexuat sa me e lexuar atë që ua ka thënë komitetit për ta lexuar edhe për të kërkuar? Fatmir Limaj i di përgjegjësit e veta dhe nuk ju jep juve llogari”, tha Sherifi.
Edhe deputetja Time Kadriaj nga AAK-ja tha se Lëvizja Vetëvendosje vazhdimisht po i injoron institucionet e shtetit, e nën anën tjetër deputetët e kësaj partie po sillen si patriotë. Ajo shtoi se deputetja Millaku nuk është e autorizuar që të flasë në emër të kryeministrit dhe nuk e pranojnë madje as rojë në ndërtesë të qeverisë.
“Ne nuk e pranojmë as rojë me kanë atje poshtë qeverisë. Çka me fol ne me këta kur nuk e pranojnë as shtetin e Kosovës, as simbolet e Kosovës, as himnin e Kosovës dhe në evenimente të rëndësishme ata nuk ngritën në këmbë duke thënë se janë patriotë. Patriot nuk është me fjalime të zjarrta, por me shkuar aty ku është vendi, për të biseduar dhe shprehur shqetësimet dhe të mos na dhunojnë këtu në parlament me deklarata të tyre”, u shpreh ajo.
