Debati “McGonigal”, Berisha: Edi Rama foli si kufomë e pakallur dhe iku si hije…

Edi Rama foli si kufomë e pakallur dhe iku si hije sepse ka kryer krime shumë të rënda, tha Kryetari i Partisë Demokratike, Sali Berisha, pasi Kryeministri u largua nga seanca plenare me përfundimin e fjalës ndonëse mocioni me debat vazhdoi, duke u zotuar se do krijohet Komisioni Hetimor për të zbardhur veprimtarinë e tij kriminale lidhur me “Skandalin McGonigal” dhe do ta heqin në fund atë.

“Shqiptarët e panë se këtu, pak kohë më parë, personi që i lëshoi karrigen McGonigalit, foli si kufomë e pakallur.

Foli kështu dhe iku si hije sepse ka kryer krime shumë të rënda. sepse, siç thotë e respektuara ‘Washington Post’, që ai në një dalje televizive e quajti gazetën më serioze, McGonigal dhe Edi Rama ishin të zhytur gjer në grykë në veprimtari sekrete. Në veprimtari të paligjshme.

Unë nuk kam fakte të zbërthej të gjithë veprimtarinë e tyre, kam besim se kjo gazetë ndër më autoritarët, ka informacion për llumin e McGonigal dhe Edvin McGonigalit.

Doli këtu se mendoi se duke lexuar, sipas tij, aktakuzën, do mund të mashtronte shqiptarët.

Unë dua të informoj shqiptarët se ka dy dokumente zyrtare të drejtësisë së SHBA. Njëri daton në shtatorin e vitit që kaloi. Ai është një vendim gjykate, për të hetuar çdo gjë rreth Edi Ramës. Për të hetuar çdo telefonatë, çdo SMS, çdo email, çdo lloj komunikimi që ai ka pasur me cilindo në botë.

Por, ky urdhër u përfshinë të gjithëve ju: të hetohen të gjithë ministrat e qeverisë dhe çdo njeri tjetër. Pra, jeni të gjithë të hetuar. Qeveria e Republikës së Shqipërisë dhe çdo person i lidhur me të, përfshirë dhe jo kufizuar, kryeministrin e Shqipërisë. Pra, secili prej jush jeni nën hetim, ndaj më mirë mendoni se nuk do shpëtoni.

E pamundur që ju në të gjithë ato komunikime, të mos keni kryer vepra të përbashkëta me Edi Ramën,” tha Kryetari i Partisë Demokratike duke folur dhe për mashtrimin e Edi Ramës kur tha se nga zyra e kryeministrit u bë porosia për të hetuar lobimin e opozitës.

“Edi Rama ka kryer së pari krimin e shëmtuar të rekrutimit me korrupsion të kryeagjentit. Më 9 shtator është takuar me McGonigal në zyrë. Kush ia solli? Duçka juaj. Gënjen ai.

Po çfarë është Duçka? Ai është njeriu që Rama e ka pajisur me pasaportë diplomatike, është zëvendësministri i Ramës që shkruante artikuj kundër gjykimit të Hagës për detin e Kinës Jugore, Duçka është njeriu që organizonte sponsorizimin prej qindra e mijëra dollarësh të ekspozitës së Ramës në Hong Kong.

Duçka është njeriu që solli McGonigal.

A ishte agjent rus McGonigal, këtë e ndan drejtësia e vendit të tij. Por ai ishte tradhtar i vendit të tij.
Edi Rama u miqësua aq shumë me të, sa kishte sekretin më të madh miqësinë me të, nuk e ndante as me shefin e shërbimeve, as me drejtorin e policisë, e ndante me Damianin, edhe me këto këtu.

Nuk është e vërtetë, thotë Edi Rama se nga zyra e kryeministrit u bë porosia për të hetuar lobimin e opozitës. Gjykata amerikane nuk gënjen. Ata disponojnë çdo gjë.

Prandaj kryetari juaj është kufomë e pakallur politike. Të blejë sa të dojë deklarata, të ardhme nuk ka,” tha Kryetari i Partis Demokratike, Sali Berisha duke u zotuar se PD do krijoj hetues parlamentar dhe do ta heqin në fund edhe Edi Ramën:

“Ne do e heqim atë, komisionin do e krijojmë. Komisioni është detyrim kushtetues.

A e dini ju sa biznesmenë janë gjobitur? E ka denoncuar Ylli Ndroqi publikisht, e kanë kërcënuar më pas Duçkat e tij.

Së fundmi, foli këto për shenjtorin Lou Bladel. Bladel e solli te Edi Rama, McGonigal.

Sokol Balla shkruante për Bladel se po kryeson grupin e investigimit të dosjeve të opozitës. Ja, pra si e përdori Ernst and Young për të mashtruar për opozitën.

Tani është koha e opozitës, opozita do transparencë. Asgjë nuk mund të na pengojë ne.”