Debati për kandidatë, Çollaku: Të konsoliduara i kemi degët, Mziu: Mati yt ka 1.300 anëtarë më pak

Deri sa Kryetari i shkarkuar i Partisë Demokratike, Lulzim Basha, flet që drejton një parti të madhe e të disiplinuar që do fitoj edhe në Republikën Popullore të Kinës, në Kryesinë e shkarkuar të PD rezulton se nuk janë dakord as kur u caktuan kandidatët për kryetar në 6 bashki për zgjedhjet e pjesshme vendore të 6 Marsit.

Për Bamkën e Lushnjes nuk bëri njeri fjalë meqi ai vetë ishte aty por kur u u bë e ditur se në Dibër u caktua Luan Haka, i pari reagoi Drejtuesi Politik i Qarkut Dibër, Xhelal Mziu, të cilin nuk e kishte pyetur njeri dhe në atë moment po e dëgjonte se kush ishte caktuar.

Lulzim Basha kot u mundua ta sqaroi duke ngatërruar pa lidhje Sali Berishën dhe Ilir Metën, në një debat me besnikët e tij që edhe i vunë flakën demokratëve që nuk mendojnë si Kryetari, por Mziut që nuk po dilte inati reagoi edhe me Kreshnik Çollaku kur mbojti kandidatin dhe tha se degët janë konsoliduar duke i bërë të qartë se në Matin ku ai është drejtues aktualisht 1.300 anëtarë të PD kanë ikur me foltoren.

Debati me dyer të mbyllura:

Lulzim Basha: Zgjedhjet e 6 marsit janë zgjedhjet e dyshes Berisha-Meta. Nuk kishte pse të kishte zgjedhje tani kur për pak muaj do të ketë sërish zgjedhje në të gjitha bashkitë, por këto janë për të sulmuar PD-në. Megjithatë, ne duhet të bëjmë çmos që të marrim votat e demokratëve, intelektualeve, pronarëve etj. Kandidatët tanë kanë dalë nga një proces në degë. Janë propozime të degës.

Xhelal Mziu: Ne nuk kemi bërë analizë të mirëfilltë për zgjedhjet e 25 prillit, ndaj për të caktuar kandidatët, besoj se duhet të ishim pyetur edhe ne që punuam në terren. Ne kemi edhe informacione se kush punoi kundër e kush na ndihmoi. Ndërkohë, edhe tani pas 9 shtatorit, kur ju kryetar morët vendimin për pezullimin, sërish nuk e bëmë analizën se kush na qëndroi dhe kush jo. Ka kryetar degësh që janë kthyer në sejmenë të degëve të tyre. Duhet të ndahen anëtarët e kryesisë dhe t’u jepet autoriteti i duhur drejtuesve politikë. Ata për terren të jenë në terren. Të ofrojnë njerëz dhe të komunikojnë me ta dhe t’i kemi në krah. Kemi shumë gjëra në dizavantazh, por duhet të dalim në terren që ta kthejmë dizavandazhin në favorin tonë.

Lulzim Basha: Për të nxjerrë këta kandidatë, ka pasur nga ato degë që kanë ardhur me një kandidaturë të unifikuar. Por ka pasur edhe degë të tjera që nuk kanë qenë të unifikuara. Për raste të veçanta, unë kam pritur në zyrë për të biseduar deri në 70 persona, për të diskutuar në lidhje me kandidaturën e mundshme. Pra, kandidaturat kanë dalë nga një proces i gjatë konsultimi.

Jemin Gjana: Marr shkas nga tensioni që u krijua. Këtu ka 30 vite që kështu janë votuar emrat në Kryesi. Unë jam njeri që, nëse doni t’u rrimë parimeve, protagonizmi është sa e ruajmë peshën në terren dhe jo kush cakton emrat. Këto janë emrat më të mirë që i ofrohen. Mendoni ju se kandidatët që dolën me primaret janë më të mirë? Ne e kuptojmë se përse u shpik 6 marsi. Sepse pas disa muajsh bëheshin zgjedhjet normale. Kjo u shpik për të sulmuar PD-në. Ne duhet të jemi të kujdesshëm për të biseduar me çdo faktor dhe çdo demokrat. Ne duhet të dalim në terren dhe të bisedojmë me çdokënd.

Lulzim Basha: Më shumë se e përçarë, Partia Demokratike është e sulmuar.

Ervin Salianji: Do të ishte e lehtë që të mos flisnim në këtë Kryesi dhe t’i kalonim emrat siç vijnë. Por ne duhet të përballemi me një opinionin që është shtruar si problematik. Nëse këta njerëz që na vendosen përpara sot si kandidatë, janë propozuar nga degët apo jo. Ka aludime që nuk ka një proces të gjerë. A kishte shumë kandidatë? Ne duhet të diskutojmë për këtë. Ata bënë një proces, ndërsa ne jo. Ne, Kryesia, duhet të përfillemi për të diskutuar emrat.

Ina Zhupa: Më vjen mirë që sot po diskutojmë për 6 emra që askush nuk ka asnjë dyshim që janë demokratë dhe kanë kontribut në degët e tyre. Pa dashur t’iu bej rezymenë, fakti që kanë ardhur nga vetë degët dhe me shkresa bile, tregon peshën e tyre. Këta janë të vetmit demokratë që do të garojnë për Partine Demokratike. Nuk duhet shqetësohemi se aty kemi në fletë edhe kandidatin e PS-së, dhe kandidatin e koalicionit LSI-PDK. Siç e dimë, edhe në 2009-2013, LSI ka marrë vota demokrate, se e kemi diskutuar në çdo takim strukturash pas 2013-ës. Kësaj radhe ato vota quhen foltore, po ne do të vazhdojmë pa asnjë pengesë nga kjo.

Roland Bejko: Kemi dy çështje. E para, janë zgjedhjet dhe raporti me terrenin. Duhen krijuar ekipet e fushatës. Duhen furnizuar me materiale kandidatët. Çdo bashki ka potenciale njerëzore me ish-individë me poste, që duhen afruar. Ne duhet të futemi për të fituar. Duke presupozuar që Berisha do të bëjë partinë e tij, ne duhet të afrojmë tanët.

Kreshnik Çollaku: Kryetarët e degëve na kanë mbrojtur me jetë dhe gjak. Ne i kemi të konsoliduara degët në zonën tonë.

Xhelal Mziu: Po çfarë janë këto që thua, mor burrë? Na kanë mbrojtur me gjak e me jetë. Ku ishte nevoja?! Ku pati gjak e rrezik për jetë? Ndërkohë ti thua se i ke degët e konsoliduara, ndërkohë që Mati yt ka 1300 anëtarë më pak. Të kanë ikur të gjithë te foltorja, si i ke në rregull? Prandaj thashë se duhet një analizë qoftë e zgjedhjeve, por qoftë edhe për situatën pas 7 shtatorit.

Agron Gjekmarkaj: Ne po merremi kot 4 orë në këtë mbledhje, ndërkohë që duhet të kishim miratuar dhe të mendonim se si t’u vinim në ndihmë kandidatëve në këtë garë. Nuk kemi pse të humbasim kohë me debate boshe./Panorama/