Dëbimi i ambasadorit të Iranit, Presidenti Donald Trump i shkruan Ramës

Presidenti i SHBA, Donald Trump ka falënderuar përmes një letre kryeministrin Edi Rama për vendimin e marrë që dy diplomatët iranianë të dëbohen pasi janë zbuluar si komplotistë të akteve terroriste në Shqipëri.

Letrën e ka bërë publike Ambasada amerikane në Tiranë, duke theksuar se SHBA përgëzon Qeverinë e Shqipërisë për veprimet kundër komplotit terrorist të Iranit në tokën shqiptare.

“E përgëzojmë Qeverinë e Shqipërisë për arsye se ndërmori veprime kundër regjimit Iranian për komplotin e tij terrorist në tokën shqiptare, duke kërcënuar sigurinë evropiane,” thekson Ambasada e SHBA në Tiranë duke shtuar se me këtë veprim Qeveria e Shqipërisë ka treguar udhëheqësi të vërtetë në përpjekjet tona të përbashkëta për t’i dërguar një mesazh të qartë Iranit se kryerja e veprimeve terroriste në Evropë, apo kudo tjetër, është e papranueshme dhe nuk do të tolerohet, ndërsa përfundon:

“Ne qëndrojmë krah për krah me Shqipërinë, aleatin tonë në NATO dhe partnerin tonë strategjik.”

Letra e plotë e Presidentit Donald Trump:

I dashur Z. Kryeministër:

Faleminderit për përpjekjet tuaja të palëkundura duke iu kundërvënë Iranit dhe duke iu kundërpërgjigjur veprimeve e përpjekjeve të tij destabilizuese për t’u mbyllur gojën disidentëve anembanë globit.

Udhëheqësia e treguar nga ju me dëbimin e Ambasadorit të Iranit nga vendi juaj është shembull i përpjekjeve tona të përbashkëta për t’i treguar qeverisë iraniane se veprimet e saj terroriste në Evropë dhe përreth botës do të kenë pasoja të rënda.

Shqipëria ka qenë gjithmonë një mike e madhe e Shteteve të Bashkura dhe unë mirëpres rritjen e partneritetit tonë, ndërsa ballafaqohemi me çështjet e shumta të rëndësishme që të dy vendet tona hasin.

Sinqerisht, Donald Trump