Dëbuan gylenistët, kallëzim penal për 22 policë
Prokuroria Speciale e Kosovës ka konfirmuar për RFE se ka pranuar kallëzime penale nga Inspektorati Policor i Kosovës ndaj 22 zyrtarëve të Policisë së Kosovës në lidhje me dëbimin e gjashtë shtetasve turq nga Kosova para më shumë se një viti, rast ky i njohur si “Gylenistët”.
Sipas Prokurorisë, kallëzimi penal është bërë nga Inspektorati Policor i Kosovës.
“Ju njoftojmë se Prokuroria Speciale e Republikës së Kosovës, ka pranuar kallëzim penal nga IPK-ja ndaj 22 të pandehurve, ndërsa jemi duke intervistuar edhe të pandehur të tjerë në lidhje me ketë rast”, ka thënë Ekrem Lutfiu, zyrtar për media nga Prokurorinë e Shtetit.
Kurse, Inspektorati i Policisë së Kosovës lidhur me kallëzimet penale që ka dorëzuar në Prokurorinë Speciale të Republikës së Kosovës, nuk ka dashur të jap ndonjë sqarim shtesë, por se në një përgjigje me shkrim për sqaron se Inspektorati lidhur me ketë rastin ka vepruar duke u bazuar në autorizimet ligjore dhe autorizimet nga Prokuroria Speciale e Republikës së Kosovës:
“Inspektorati Policor i Kosovës, respektivisht hetuesit e Departamentit të Hetimeve, lidhur me rastin e dëbimit të shtetasve turq nga Republika e Kosovës për në Turqi, bazuar në autorizimet ligjore dhe autorizimet nga Prokuroria Speciale e Republikës së Kosovës, kanë ndërmarrë veprime hetimore dhe pas këtyre veprimeve kanë dorëzuar edhe kallëzim penal ndaj 22 zyrtarëve të Policisë së Kosovës,” thekson Inspektorati i Policisë së Kosovës.
Ndryshe, në mars të vitit 2018, me kërkesë të autoriteteve turke, autoritetet kosovare patën arrestuar dhe dëbuar për në Turqi gjashtë shtetas turq. Për gjashtë shtetasit turq, Ankaraja dyshon se janë anëtarë të organizatës “Hizmet”, të udhëheqësit fetar turk, Fetullah Gulen. Këtë të fundit, autoritetet turke e fajësojnë për një përpjekje për grusht-shtet në Turqi në vitin 2016.
Dëbimi i tyre kishte nxitur reagime të ashpra nga shtetet perëndimore, por edhe vetë Ish-Kryeministri Ramush Haradinaj, që pati deklaruar se nuk ishte në dijeni të këtij operacioni.
Më 28 qershor të vitit 2018, Parlamenti i Kosovës themeloi Komisionin Hetimor Parlamentar për ndriçimin e rastit të dëbimit nga Kosova të gjashtë shtetasve turq.
Anëtari i Komisionit Hetimor Parlamentar në Parlamentin e Kosovës për dëbimin e gjashtë shtetasve turq, Sami Kurteshi, tha se i gjithë procesi i lidhur me rastin e njohur si “Gylenistët” duhet të shkojë deri në fund dhe të zbardhet si rast.
“Unë mendoj se ky nuk është proces që mund të lihet pa shkuar deri në fund. Ne kemi ligj, kemi Kushtetutë e kemi një Kod Penal dhe i kemi të gjitha normat për aq sa janë dhe duhet të zbatohen deri në fund. Ky nuk ka qenë një veprim krejt i thjeshtë dhe ky rast duhet të shkojë deri në fund dhe nëse nuk shkon tash, duhet të shkojë pas një kohe, por kjo vepër nuk vjetrohet”, tha Kurteshi.
Komisioni hetimor parlamentar në Kosovë në lidhje me deportimin e gjashtë shtetasve turq kishte intervistuar dhjetëra persona. Ditën e fundit të raportimeve u thirr për të tretën herë edhe presidenti Hashim Thaçi që refuzoi të përgjigjet, ndërkaq folën edhe familjarët e të deportuarve.
Dëbimi i gjashtë gylenistëve kishte nxitur reagime të ndryshme të institucioneve vendore dhe ndërkombëtare, posaçërisht nga organizatat për të drejtat e njeriut, të cilat e kanë dënuar veprimin e institucioneve të Kosovës.
Dhe më 24 qershor Kuvendi i Kosovës, ka miratuar Raportin e Komisionit Hetimor Parlamentar lidhur me rastin e dëbimit të gjashtë shtetasve turq.
Raporti ka kaluar me 59 vota për, dy kundër dhe katër abstenime.
