“Defender Europe 2023”, Hovenier: Kosova, nga vend konsumi, në shtet që eksporton siguri!

“Kosova vazhdon të transformohet nga konsumator e sigurisë, në një eksportuese të sigurisë, duke ndihmuar për të ofruar siguri më të madhe në tërë botën,” tha Ambasadori i SHBA në Kosovë, Jeff Hovenier, në ceremoninë e fillimit të stërvitjes “Defender Europe 2023” në Sheshi Skënderbeu në Prishtinë duke e konsideruar këtë ngjarje si arritje të madhe të Kosovës si dhe përforcim të marrëdhënieve mes SHBA dhe Kosovës.

“Derisa po shohim pasojat e  tmerrshme të luftës së nisur nga Putini në Ukrainë, është shumë relevante një ushtrim i tillë,” tha Hovenier duke shtuar se “Defender Europe 2023” është një stërvitje shumëkombëshe, e hartuar për të rritur ndërveprimin midis  SHBA-së dhe 26 shteteve të tjera.

Kjo stërvitje, saktësoi ai, drejtohet nga komanda e SHBA-së dhe bëhet për të siguruar edhe aleatët dhe për të zmbrapsur ata që rrezikojnë dhe për të mbrojtur kontinentin evropian nga agresioni.

Diplomati amerikan u shpreh se një nga qëllimet është që të demonstrohet përkushtimi i aleatëve dhe partnerëve për të rritur shkallën, kapacitetin dhe ndërveprimin e tyre.

Ai tha se në këtë stërvitje janë mbi 9 mijë pjesëtarë të personelit amerikan të cilët do t’i bashkohen 17 mijë ushtarëve të tjerë.

Hovenier rikujtoi se “Defender  2023” ishte përmendur që në takimin e parë me kryeministrin Kurti e ministrin Mehaj, e gjeneral Jasharin, para një viti e gjysmë.

“Pra jemi përgatitur për shumë kohë,” tha Hovenier dhe ky model i mbrojtjes kolektive është shumë i kundër me modelet që të tjerët mund t;i përdorin.

“Ne i fuqizojmë dhe përforcojmë aleatët tanë në tërë rajonin, në vend se t’i diktojmë veprimet e tyre”, u shpreh ai, duke shtuar se vizioni i përbashkët është i qartë.

Presidentja: Lufta jonë ishte për liri, kjo është e vërteta e vetme

Presidentja Vjosa Osmani në fjalën e saj, tha se ka nderin që qëndron para ushtarakëve që janë gardian të paqes e lirisë në një botë gjithnjë më komplekse e sfiduese.

“Ju qëndroni të bashkuar nën kauzën e vetme, të përbashkët për ta forcuar bashkëpunimin e rritur ndërveprimin midis forcave aleate,” tha Osmani duke shtuar se kjo stërvitje është kujtesë se forca nuk qëndron vetëm në armë, por edhe lidhjet tona dhe aleancën e përbashkët.

Objektivi kryesor i kësaj stërvitje, tha Presidentja, është shfaqja e fuqisë ushtarake për të siguruar paqen. Duke lidhur këtë stërvitje edhe me Skënderbeun, ku edhe po mbahet ceremoni e hapjes, ajo tha se ai ishte strategu dhe mbrojtësi i Perëndimit.

“E krahas tij, është shtatorja e Ibrahim Rugovës, presidentit historik që ishte edhe arkitekti i pavarësisë sonë, vizioni i të cilit ishte i mishëruar në vlerat perëndimore e pro demokratike.” tha Osmani duke shtuar se kjo stërvitje përkon edhe me 24 vjetorin e  çlirimit të Kosovës.

“Është ditë aq e freskët sa edhe ndërhyrja e NATO-s kundër regjimit të Millosheviqit. Ne ishim viktima e regjimi i Millosheviqit ishte agresori,” tha Presidentja Vjosa Omsnai duke përfunduar:

“Kjo është ë vërteta e vetme që do ta mbrojmë çdoherë e kudo. Le të shërbejë kjo stërvitje ndërkombëtare si triumf i shpirtit njerëzor dhe vullnetit të paepur të ushtarëve si ju”.

Kurti: Siç ka thënë Skënderbeu, bashkimi bën fuqinë

Kryeministri Albin Kurti në fjalën e  tij, tha se “Defender Erupe 2023” është ngjarja më e madhe ushtarake që ka ndodhur ndonjëherë në Kosovë.

“Kosova është e nderuar që për herë të dytë është vend nikoqir i ushtrimit që shtrihet nga zona e Mesdheut e deri në kufijtë lindor. Mbi 1 mijë e 300 ushtarakë do të ekzekutojnë detyra në krah të 24 mijë ushtarakëve të forcave të armatosura të 25 vendeve të NATO-s dhe atyre partnere të SHBA-së,” tha kryeministri Kurti duke shtuar e FSK në këtë stërvitje radhitet e katërta në mesin e 25 ushtrive pjesëmarrëse sa i përket numrit të personelit të angazhuar.

Kjo është dëshmi e vullnetit për ndërtim të kapaciteteve të mbrojtjes dhe përkushtimit të palëkundur për të qenë pjesë e sistemit të përbashkët të mbrojtjes së vendeve që përqafojnë e përfaqësojnë vlerat demokratike, tha Kurti duke theksuar se siguria e Evropës është interes jetik i Kosovës.

Kryeministri rikujtoi se “Defender Europe 2021” ishte më pak se një vit para se Rusia të shpërfaqte në mënyrën më agresive e brutale të synimeve të saj të vjetra për të t’u shtrirë dhunshëm në thellësi të Evropës.

“Defender Europe 2023’ po zhvillohet në realitet të tensionuar, 15 muaj pas invazionit rus në Ukrainë”, tha Kurti, sidoqoftë, edhe motoja “bashkë më të fortë” është vetëm një variacion i thënies së famshme të Skënderbeut se “Bashkimi bën fuqinë”.

Duke iu dëshiruar suksese, Kryeministri siguroi ushtarakët se do të vazhdojnë ta kenë mbështetjen e qeverisë dhe shtetit në ngritje dhe zhvillim profesional.

Ndryshe, “Defender Europe 2023” drejtohet nga ushtria amerikane. Kosova është mikpritëse e mbi 1 mijë trupave. Ushtrimet do të kryhen në Bokë dhe aeroportin e Gjakovës.

Në ceremoninë e fillimit të stërvitjes ku mikëpritëse është Kosova, ishin preznet presidentja Vjosa Osmani, kryeministri Albin Kurti,  ministri i Mbrojtjes, Armend Mehaj,  komandanti i FSK-së, Bashkim Jashari, ambasadori amerikan, Jeff Hovenier etj.

Stërvitja “Defender Europe 2023” do të mbahet nga 21 maji deri me 2 qershor.