“Defender European 21”, Presidentja e Kosovës: FSK, sinonim i shtetësisë sonë!
Sot po jetësohet ëndrra e secilit ushtarak dhe qytetar të Kosovës, tha Presidentja e Kosovës, Vjosa Osmani duke folur para qindra ushtarëve të Forcës së Sigurisë së Kosovës të cilët po kryejnë operacione ushtarake në kuadër të stërvitjes “Defender Europe 21”, duke shtuar se FSK tashmë është sinonim i shtetësisë sonë, mbrojtjes së sovranitetit dhe paprekshmërisë së territorit të Republikës së Kosovës.
“U shpreh mirënjohjen time dhe të popullit për shërbimin tuaj të jashtëzakonshëm ndaj atdheut tonë. Po e shoh sot të jetësuar ëndrrën e secilit ushtarak e qytetar të Republikës së Kosovës. Të dashur oficerë te forcave tona të armatosura, të dashur ushtarak, 22 vjet më parë gra e burra të Kosovës u rreshtuan në emblemën e UÇK-së dhe dëshmuan këmbënguljen tinë për te fituar lirinë. Ata e patën guximin për të qëndruar fortë në kauzën e lirisë e patën fatin të vepronin nën flamurin e një aleance me perëndimin. E kemi ditur se duke luftuar për lirinë tonë i kemi mbrojtur vlerat e lirisë universale. 22 vjet pas, i kemi lidhur qëllimet tona me përkushtimin e partnerit tonë strategjik me Shtetet e Bashkuara të Amerikës”, tha Presidentja Osmani duke shtuar se ngritja e kapaciteteve si pjesë e planit gjithëpërfshirës sot po e merr vulën e përkrahjes nga partnerët strategjik të Kosovës ndërsa përfundoi.
“Të dashur ushtarak, FSK është sinonim i shtetësisë sonë, mbrojtjes së sovranitetit dhe paprekshmërisë së territorit të Republikës së Kosovës. Po e vulosni fatin tonë të përbashkët në shërbim te paqes e shpirtin tonë liridashës e të vendosur. Për shërbimin tuaj sot ju do të mbaheni në mend nesër e përgjithmonë, andaj ndjehuni krenar për atë që keni bërë për vendin tonë.”
Ndërsa Kryeministri i Kosovës, Albin Kurti, tha se stërvitja e Forcës së Ushtrisë së Kosovës “Defender European 21” e dëshmon qartë synimin e ushtrisë për një një ambient të sigurt dhe paqësor në Evropë dhe më gjerë.
“Veçantia e këtij ushtrimi lidhet me faktin se SHBA-të i dhanë besimin vendit tonë dhe FSK-së për herë të parë, të mirëpres një pjesë të këtij ushtrimi në territorin tonë. Pjesëmarrja e FSK-së në këtë ushtrim dëshmon qartë synimin e ushtrisë për një ambient të sigurt dhe paqësor në Evropë dhe më gjerë.
Profesionalizmi i juaj në këtë operacion vërteton se FSK-ja është e vullnetshme, e gatshme e aftë për të ndihmuar dhe kontribuar për sigurinë kontinentale dhe globale. Ju ushtarakë gjatë këtij ushtrimi keni shtyrë kufijtë e juaj më të skajshëm,” tha Kryeministri Albin Kurti i bindur:
“Ju ua dëshmoni qytetarëve se forca jonë është e gatshme për të mbrojtur sovranitetin dhe territorin e vendit tonë dhe çdo ditë me shumë është duke arritur standardet që duhet për t’u bërë pjesë e strukturave euro-atlantike.”
Presidentja e Kosovës, Vjosa Osmani dhe Kryeministri Albin Kurti sot në Devë të Gjakovës, ku është vendosur kampi ushtarak tash e dhjetë ditë prej kur ka filluar “Defender Europe 21” në Kosovë, kanë falënderuar ushtarakët për kontributin e tyre në shërbim të atdheut.
