Deklarata e Hovenier, Lista Srpska: Për t’ia bërë qejfin opinionit në Kosovë!
Pas deklaratës së Ambasadorit të Shteteve të Bashkuara në Prishtinë, Jeffrey Hovenier, se Kosova është shtet sovran dhe se Lista Srpska është parti politike opozitare dhe përfaqëson serbët etnikë në Kosovë, ka reaguar Lista Srpska duke theksuar se deklarata e Ambasadorit Hovenier ishte për t’ia bërë qejfin opinionit në Kosovë ndërsa me gjuhën e kriminelit Milorad Dodik shton se kjo parti përfaqëson kudo interesat e popullit serb.
”Përfaqësuesit e Listës Srpska kudo që janë dhe këdo që takojnë do të përfaqësojnë gjithmonë interesat e popullit serb, sepse është detyrë e jona ndaj qytetarëve që mbështesin partinë tonë. Gjithashtu duam të theksojmë se politikën tonë gjithmonë e kanë vendosur autoritetet e Lista Srpska duke respektuar interesat e qytetarëve tanë dhe jo nga diktimi i askujt,” thekson Lista Srpska përmes një komunikate duke përfunduar:
“Kështu do të vazhdojë të jetë, si në Washington, ashtu edhe në Prishtinë, në cilindo qytet të botës apo para ndërtesave komunale me qytetarët e tyre në mënyrë paqësore dhe demokratike, gjithmonë do te luftojmë për të drejtat e popullit serb, mbijetesën dhe qëndrimin e tyre ne vatrat e tyre shekullore.”
Ndryshe, duke folur për takimin e Listës Srpska me të dërguarin e posaçëm të Washingtonit për Ballkanin Perëndimor, Gabriel Escobar, Ambasadori i Shteteve të Bashkuara në Prishtinë, Jeffrey Hovenier, tha se SHBA kërkon dhe pret që Lista Srpska të marrë pjesë në zgjedhje ndërsa ritheksoi se s’duhet të vihet në pyetje se Kosova është shtet sovran dhe se Lista Srpska është parti politike opozitare në Kosovë.
