Deklarata Haradinajt/ Stoltenbeg: Nëse rritet mandati i FSK, NATO do ta shqyrtojë nivelin e bashkëpunimit!

Sekretari i Përgjithshëm i NATO-s, Jens Stoltenberg tha sot se ka biseduar me kryeministrin e Kosovës, Ramush Haradinaj dhe Presidentin e Serbisë, Aleksandar Vuçiç, për t’i njoftuar rreth takimit të djeshëmmes ministrave të Jashtëm të NATO-s për Ballkanin Perëndimor.

Ai ka deklaruar se i ka theksuar si Prishtinës ashtu edhe Beogradit nevojën për qetësi dhe përmbajtje, si dhe anashkalim të ndonjë hapi apo deklarate provokative.

“Me zotin Haradinaj, kam shqyrtuar planin për transformimin e Forcës së Sigurisë së Kosovës në ushtri. Kam theksuar se një hap i tillë vjen në kohë të papërshtatshme dhe është kundër këshillës së dhënë nga disa aleatë të NATO-s andaj mund të ketë pasoja negative në perspektivën e Kosovës për integrim euro-atlantik”, është thënë në deklaratën e NATO-s.

“Nëse do rritet mandati i FSK-së, NATO-s i duhet të shqyrtojë nivelin e bashkëpunimit me këtë Forcë,” tha ndër të tjera Stoltenberg.

Sa i përket bisedimeve me presidentin serb Vuçiç, në deklaratën e NATO-s theksohet se Stoltenberg i ka përmendur presidentit serb nevojën për zbutur tensionet.

“U kam rikujtuar të dyve se dialogu i ndërmjetësuar nga Bashkimi Evropian në mes të Prishtinës dhe Beogradit është rruga e vetme për të arritur paqe dhe stabilitet në rajon.

NATO mbetet e përkushtuar për paqe dhe stabilitet në Kosovë përmes misionit tonë paqeruajtës të KFOR-it,”theksohet  në deklaratë.

Ndryshe, dje Sekretari i Përgjithshëm i NATO-s, Jens Stoltenberg, e paralajmëroi Prishtinën se do të “përballet me pasoja serioze nëse vazhdon me transformimin e Forcës së Sigurisë së Kosovës në ushtri të Kosovës”.

Megjithatë sot kryeministri i Kosovës, Ramush Haradinaj ka konfirmuar sot në Parlamentin e Kosovës se tri projektligjet të cilat i hapin rrugë transformimit të Forcës së Sigurisë së Kosovës në kapacitete ushtarake, do të votohen me 14 dhjetor në Kuvendin e Kosovës.