Deklarata/ OSBE në shërbim të Edi Ramës, pse sot shqetësohet dhe dje heshti për “gjakderdhje”
Pak orë para protestës së opozitës, në përpjekje për të dekurajuar qytetarët që të mos marrin pjesë në protestë, Organizata për Siguri dhe Bashkëpunim Evropian, OSBE, me Prezencën e saj më kriminale që prej se ka shkelur në tokën shqiptare kjo Organizatë, akuzon për përmendjen e “derdhjes së gjakut” para protestës sepse është e papërputhshme me demokracinë moderne:
“I nxitim pjesëmarrësit dhe drejtuesit e protestës së sotme të jenë të përmbajtur. Përmendja e derdhjes së gjakut, pak ditë përpara një proteste publike, është e papërputhshme me demokracinë moderne dhe me protestat demokratike,” thekson OSBE sot përmes një deklarate, për një fjalë të shkëputur nga konteksti i një fjalimi të liderit të opozitës.
Po sikur të bëhet fjalë edhe për një kërcënim direkt ku opozita nuk ka asgjë në dorë, nëse OSBE vërtetë angazhohet për demokraci moderne, pse heshti Gushtin e vitit 2015, kur Kryeministri i Shqipërisë, Edi Rama në një intervistë për Newsweek ishte më i qartë se kurrë, më i armatosur se kurrë si me ushtri ashtu dhe polici e krim të organizuar, dhe kërcënoi me gjakderdhje:
“Sot, ne kemi një paqe në rajon, të cilën nuk e kemi pasur kurrë në histori,” është shprehur Edi Rama për “Newsweek”, i vetëdijshëm se, siç thotë ai, “ne nuk jemi engjëj dhe as nuk kemi për të qenë ndonjëherë, por se kjo paqe është rezultat i aspiratës së të gjithë popujve në këtë zonë për të qenë pjesë e Europës”.
Duke e çuar më tej idenë e tij, Kryeministri i Shqipërisë i tha të përjavshmes amerikane se “nëse Europa do të vazhdojë të tregojë lodhje nga zgjerimi, atëherë ajo rrezikon që ta shohë këtë rajon të lodhur nga durimi. Nëse durimi merr fund, Ballkani gjithmonë do të identifikohet me gjakderdhje,” është shprehur Kryeministri i Shqipërisë, Edi Rama duke e lënë të pashqetësuar OSBE-në ndonëse ishte kërcënimi i radhës për pak muaj si në gazetën Hyriet ashtu dhe në “Conflict Zone” të DW. OSBE heshti dhe kur në shtatorin e vitit 2015 ai u pyet në DW pikërisht për këtë kërcënim nga gazetari Tim Sebastian:
Tim Sebastian: Dhe përveҫ këtyre të gjithave, është kërcënimi që ju bëtë në maj, kur i thatë gazetës turke, Hyriet: “Për sa kohë që ëndrra jonë europiane është gjallë, Ballkani nuk do të ketë shqetësime, por nëse kjo ëndërr zhbëhet, do të kemi shqetësime.“ Me fjalë të tjera: Na jepni atë që duam, ose ne do t’iu shkaktojmë probleme.“
Edi Rama: Jo, kjo nuk është kështu
Tim Sebastian: Ky është kërcënim, pse nuk është kështu?
Edi Rama: Nuk është kërcënim!
Dhe kërcënimet do të vazhdojnë në prag të çdo Progresraporti dhe vendimi për çeljen e negociatave dhe OSBE, heshti!
Mesazhi i OSBE-së
E tërë familja e OSBE-së — Prezenca e OSBE-së në Shqipëri, Kryetari i Radhës i OSBE-së dhe ministri i Jashtëm e për Evropën i Sllovakisë, Miroslav Lajčak, Sekretari i Përgjithshëm i OSBE-së, Thomas Greminger, Presidenti i Asamblesë Parlamentare të OSBE-së, George Tsereteli dhe Sekretari i Përgjithshëm i Asamblesë Parlamentare të OSBE-së, Roberto Montella — e dënuan fuqishëm përdorimin e dhunës, nga ana e protestuesve, në kryeqytetin e Shqipërisë, Tiranë, më 11 maj 2019. Ata theksuan të drejtën për t’u tubuar dhe për të protestuar në mënyrë paqësore, por nënvizuan se dhuna është e papranueshme dhe se trazirat nuk mund të zëvendësojnë angazhimin politik demokratik. E sjellim në vëmendje këtë deklaratë përpara protestës së 25 majit 2019. Deklarata mbetet po aq e vlefshme sa edhe dy javë më parë. Koktejet e molotovit, hedhja e gurëve dhe e shashkave janë të paligjshme; reagimi i tepruar i forcave të rendit nuk mund të pranohet. I nxitim pjesëmarrësit dhe drejtuesit e protestës së sotme të jenë të përmbajtur. Përmendja e derdhjes së gjakut, pak ditë përpara një proteste publike, është e papërputhshme me demokracinë moderne dhe me protestat demokratike.
