Deklaratë, deputetët e Lulzim Bashës sërish në zgjedhje për fitoren e Edi Ramës
Publikimi i kërkesave të Gazment Bardhit për negociatorin Edi Paloka mëngjesin e sotëm në mediat preferenciale të Lulzim Bashës, ishte paralajmërim se deputetët e tij do të tërhiqen nga neogicatat për bashkimin e Partisë Demokratike për zgjedhjet lokale të 14 Majit 2023. Kështu dhe ndodhi!
Deputetët që mbështesin Lulzim Bashën u mblodhën për ti thënë demokratëve sërish si në zgjedhjet e pjesshme lokale të muajit mars, se në zgjedhjet e 14 Majit 2023 do të dalin me kandidatët e vet për të luftuar për përçarjen e demokratëve, përkatësisht fitoren e kandidatëve të Edi Ramës.
Dhe, ashtu siç bëri pas çdo humbje, Lulzim Basha edhe me këtë rast përmes një deklarate fajësoi Sali Berishën dhe ata që e mbështesin, pasi me këtë rast na paskan minuar mundësinë e sinqertë për bashkëpunim, për të cilën Basha dhe deputetët e tijë janë angazhuar.
Për ata që dyshojnë nëse është Lulzim Basha apo Enkelejd Alibeaj që drejton këtë grup deputetësh, mjafton fjalia e parë e deklaratës për të dëshmuar se është Basha dora vetë, sepse ai është njeriu i vetëm në botë që gënjen e mashtron që në fjalinë e parë:
“Më datë 10 Tetor Grupi Parlamentar i Partisë Demokratike në mënyrë unanime shprehu vullnetin e plotë dhe të sinqertë për të gjetur,” thuhet në Deklaratën e cila tregon se kanë dështuar negociatat për bashkim dhe pjesën që ka mbetur besnike ndaj tij e quan “Grupi Parlamentar i Partisë Demokratike”, dhe, ndonëse është vetëm një pjesë që mbeti pa u bashkuar me pjesën tjetë për tu bërë Grup Parlamentar, deklarata thotë se “votoi në mënyrë unanime”!
Pjesa tjetër e Deklaratës nuk ka rëndësi, mund ta ketë shkruar edhe Fuga!
Ja dhe deklarata e plotë:
Deklaratë
Më datë 10 Tetor Grupi Parlamentar i Partisë Demokratike në mënyrë unanime shprehu vullnetin e plotë dhe të sinqertë për të gjetur format e duhura të bashkëpunimit për zgjedhjet lokale fillimisht duke nisur me të gjithë Partinë Demokratike dhe me çdo faktor opozitar.
Kjo mundësi e sinqertë për bashkëpunim, me qëllim bashkimin e çdo zëri opozitar dhe përballja me një kandidat të vetëm të PD dhe opozitës në zgjedhje, në vlerësimin e Grupit Parlamentar të PD, ishte zgjidhja e vetme për t’u përballur me regjimin e Edi Ramës në zgjedhjet lokale.
Ne shprehim keqardhjen që në kundërshtim me zotimin publik për “bisedime pa kushte”, prevaloi interesi dhe kushti për të njohur “Statutin” e 11 Dhjetorit, duke minuar në këtë mënyrë bisedimet për të gjetur zgjidhje për zgjedhjet lokale. Anëtarët, simpatizantët dhe votuesit e Partisë Demokratike, janë të lodhur nga debati “kush është statuti në fuqi i Partisë Demokratike”. Ato kërkojnë zgjidhje për të unifikuar çdo zë opozitar përballë Edi Ramës në zgjedhje lokale. Humbja e kësaj mundësie me kokëfortësi dhe duke injoruar situatën e rëndë që po kalon Partia Demokratike, nuk është në interes të qytetarëve dhe dobëson alternativën e opozitës në zgjedhjet lokale të 14 Majit.
Refuzimi i vazhdueshëm i çdo propozimi të bërë nga ana jonë, përfshirë propozimin final të paraqitur edhe me shkrim, është tregues i mungesës së sinqeritetit dhe vullnetit për të gjetur zgjidhje. Ky refuzim provon paramendimin për të mos gjetur zgjidhje dhe vënien para faktit të kryer të palës tjetër. Kjo bëhet evidente nga fakti që ndërsa palët ishin në bisedime mes tyre, njëra palë vijonte me akte të njëanashme apo me deklarata publike të disa përfaqësuesve politik që shkonin në frymën e nxitjes së dështimit të bisedimeve mes palëve.
Nisur nga kjo situatë, Grupi Parlamentar i Partisë Demokratike ka kërkuar të informohet Kryesia e Partisë Demokratike, për t’i hapur rrugë krijimit të të gjitha kushteve për përgatitjen dhe pjesëmarrjen e Partisë Demokratike në zgjedhjet e ardhshme vendore.
