Dekorimi, Berisha: Ambasadori Walker, nuk është vetëm hero i Kosovës, por i çdo shqiptari!

Në muret me historisë së këtij kombi, Ambasadori William Walker është jo vetëm një hero i Kosovës, por i çdo shqiptari, pasi ai ka bërë për lirinë kombëtare që shqiptarët nuk i dalin borxhit kurrë, tha sot Kryetari i Partisë Demokratike, Sali Berisha, në ceremoninë e dekorimit të organizuar nga Bashkia Kavajë dhe Shoqata e të Përndjekurve Anti-Komunistë, ku u vlerësua me titullin e mirënjohjes personalitete që kanë kontribuar për kauzën shqiptare si Ambasadori amerikan, William G. Walker.

“Një përshëndetje shumë të përzemërt të gjithëve ju në këtë sallë, qytetarëve të Kavajës kudo që janë sot.
Një përshëndetje të përzemërt ambasadorit Walker, këtij personaliteti, emri i të cilit skalitet me daltë në memorien e çdo shqiptari që do lirinë.
Në muret e historisë së këtij kombi, ambasadori Walker është jo vetëm një hero i Kosovës, por është një hero i Shqipërisë dhe hero i çdo shqiptari, pasi ai ka bërë për lirinë kombëtare, si individ, ka dhënë një kontribut që shqiptarët nuk i dalin borxhit kurrë.

I dashur ambasador, historia e Kosovës është medalje me dy anë. Në njërën anë është qëndresa e pamposhtur e qytetarëve të saj ndaj përpjekjeve të pandërprera për eksterminimin e tyre, ndaj përpjekjeve të pandërprera për shpopullimin e saj, për shfarosjen e shqiptarëve nga masakra në masakër, por është edhe histori barbarish ndaj Kosovës.
Masakra e Raçakut, në njëfarë mënyre falë këtij burri që kemi ne sot, ishte rasti kur flijimi i 45 burrave, grave, fëmijë, u shndërrua në dritë lirie për mbarë Kosovën dhe kombin shqiptar,” tha Sali Berisha duke shtuar se Ambasadori Walker ka pasur masakra të tjera shumë herë më të mëdha.

“Mjerisht disa prej tyre të kryera nga serbë dhe shqiptarë, nga Beogradi dhe Tirana komuniste, e tillë është famëzeza masakër e Tivarit, që mund të renditet e dyta pas Luftës së Dytës Botërore, pas asaj të Katinit.
Por ato i mbuluan ndryshku i kohës, balta e kohës, tymi i kohës sepse ato nuk patën një dëshmitar vigan si ambasadori, i cili me qëndrimin e tij u shndërrua, me klithmën e tij zgjoi ndërgjegjen e mbarë botës së qytetëruar, por para të gjithash, të vendit të tij të madh, të vendit të lirisë, të SHBA,” tha Kryetari i Partisë Demokratike në ceremoninë e dekorimit të Ambasadorit William Walker në Kavajë, për shqiptar i njohur që 26 vjet si shef i misionit të OSBE në Kosovë kur ndodhi dhe masakra e tmerrshme e Reçakut.
“Pa qëndrimin tuaj, pa guximin, pa ndershmërinë tuaj, ndoshta historia e Kosovës nuk do ishte kjo që është sot.
Ndaj dhe ne kemi një mirënjohje të pakufishme ndaj jush,” tha Kryetari i Partisë Demokratike, Sali Berisha, në këtë ceremoni duke përfunduar:

“Me këtë rast unë dua të falënderoj kryetarin e Bashkisë së Kavajës, Fisnik Qosen që ka zgjedhur të shprehë nderimin e këtij qyteti ndaj jush.”

Ndryshe, Ambasadori William Walker, ishte shefi i misionit vëzhgues të OSBE-së në Kosovë, 15 janarin e vitit 1999, kur në fshatin Reçak u vranë e u masakruan barbarisht 45 shqiptarë të paarmatosur.

Masakrën e Reçakut ai e cilësoi krim kundër njerëzimit që ishte dhe masakra e cila tmerroi botën dhe zgjoi ndërgjegjen e diplomacisë botërore dhe vëmendjen e gjithë botës së civilizuar që shpalosi të vërtetën rreth planit gjenocidal të ish-kriminelit serb Slobodan Milosheviç.

Pas Masakrës së Reçakut, çështja e Kosovës u diskutua në konferencën ndërkombëtare në Rambuje, dështimi i së cilës ishte vendimtar për ndërhyrjen e NATO-së kundër forcave ushtarake serbe, largimin e tyre nga toka kosovare dhe vendosjen e administratës ndërkombëtare në Kosovë.