Dekriminalizimi “kap” edhe një Kryetar bashkie, Prokuroria: Qerim Ismailaj, i dënuar me 3 vite burg në Greqi!
Ligji i Dekrimalizimit gjenë të dënuar Kryetarin e Bashkisë Mallakastër, Qerim Ismailaj, me vendim të formës së prerë .
Pas denoncimit nga Partia Demokratike dhe hetimeve të kryera, Prokuroria e Përgjithshme ka arritur në përfundimin se Qerim Ismailaj ka qenë i dënuar me tre vite burg në Greqi.
“Deklaruesi Qerim Ismailaj, me funksion kryetar i Bashkisë Mallakastër, rezulton i dënuar me veprim të formës së prerë, për kryerjen e një vepre penale, nga autoriteti gjyqësor i huaj. Referuar vendimit 9-11/2000 të Gjykatës së Përbërë nën Betim të Chios, i formës së prerë,” thekson Prokuroria e Përgjithshme duke shtuar:
“Rezulton se i akuzuar Qerim Ismailaj (në mungesë në gjykim), është deklaruar fajtor dhe është dënuar me 3 vite burgim për veprën penale të “Konfliktit”/ “Përleshjes”, parashikuar nga neni 313 i Kodit Penal të Republikës së Greqisë, që i korrespondon veprës penale të “dëmtime të tjera me dashje” parashikuar nga neni 90/1 të Kodit Penal të Republikës së Shqipërisë, e cila si sanksion parashikon dënim vetëm me gjobë”.
Tani është KQZ i cili vendos për fatin e Kryetarit të Bashkisë Mallakastër, Qerim Ismailaj.
Ndryshe, dje Prokurori i Përgjithshëm, Olsian Çela, duke raportuar në Parlament bëri me dije se për disa nga 28 kandidatët për deputetë që KQZ dërgoi në Prokurori për verifikim të thelluar para zgjedhjeve parlamentare të 25 prillit, janë dërguar letërporosi në vendet në të cilat dyshohet se mund të kenë kryer shkelje.
